قصور (طارق نوید سندھوسے)قصور کے علاقے کھڈیاں میں خطرناک ڈاکو کی گرفتاری کے دوران بہادری کا مظاہرہ کرنے والے شہری محبت علی سے ڈی پی او قصور، محمد عیسیٰ خاں نے ملاقات کی۔ ڈی پی او نے شہری کی جرات کو سراہتے ہوئے اسے نقد انعام اور تعریفی سرٹیفکیٹ دینے کا اعلان کیا۔
محمد عیسیٰ خاں نے کہا کہ واردات کے دوران جان خطرے میں ڈال کر پولیس سے تعاون کرنے والا محبت علی اصل ہیرو ہے۔
پولیس کے مطابق گرفتار ڈاکو کی شناخت عثمان زیب، سکنہ شرقپور جبکہ ہلاک ڈاکو کی شناخت تنویّر، سکنہ مرزا پور ننکانہ کے نام سے ہوئی۔ گرفتار ملزم نے ابتدائی تفتیش میں اپنی شناخت چھپائی، تاہم فنگر پرنٹ اور فیس ٹریس ٹیکنالوجی سے اس کی تصدیق ہوئی۔
عثمان زیب مختلف مقدمات میں مطلوب خطرناک اشتہاری نکلا، جن میں دہشت گردی، قتل، اقدام قتل اور پولیس مقابلہ شامل ہیں۔ ملزم 2020 میں تھانہ شرقپور میں تعینات اے ایس آئی محمد بوٹا کی شہادت میں بھی ملوث تھا۔ تھانہ کھڈیاں پولیس نے ملزم کا ریمانڈ حاصل کر کے مزید تفتیش شروع کر دی ہے۔