قومی اسمبلی سیکرٹریٹ سے خود کو گریڈ 17 کا افسر ظاہر کرنے والے ایک جعلساز کو گرفتار کر لیا گیا۔
قومی اسمبلی کے ترجمان کے مطابق گھوٹکی سے تعلق رکھنے والا عبدالواجد خود کو قومی اسمبلی سیکرٹریٹ کا ملازم اور گریڈ 17 کا افسر ظاہر کرتا رہا۔ ملزم کے قبضے سے قومی اسمبلی سیکرٹریٹ کا جعلی تقرر نامہ بھی برآمد ہوا، جس پر اسپیکر قومی اسمبلی کے جعلی دستخط کیے گئے تھے۔ترجمان کے مطابق ڈی جی ایف آئی اے نے کارروائی کرتے ہوئے ملزم عبدالواجد کو گرفتار کر لیا۔ ابتدائی تحقیقات کے مطابق ملزم جعلی شناخت کے ذریعے غیر قانونی مراعات اور پروٹوکول بھی حاصل کرتا رہا۔
ترجمان نے بتایا کہ عوامی شکایات اور سوشل میڈیا پر معاملہ سامنے آنے کے بعد اسپیکر قومی اسمبلی کی ہدایت پر فوری کارروائی عمل میں لائی گئی۔قومی اسمبلی سیکرٹریٹ نے واضح کیا ہے کہ عبدالواجد نامی شخص کا ادارے سے کسی قسم کا کوئی تعلق نہیں اور نہ ہی اس کی تقرری کا کوئی سرکاری ریکارڈ موجود ہے۔ترجمان نے مزید کہا کہ اسپیکر قومی اسمبلی یا کسی بھی سرکاری عہدے کے نام پر جعلی دستاویزات تیار کرنا ایک سنگین جرم ہے۔ عوام سے اپیل کی گئی ہے کہ ایسے جعلسازوں سے ہوشیار رہیں اور قومی اسمبلی سیکرٹریٹ سے منسوب کسی بھی تقرری نامے یا دستاویز کی لازماً تصدیق کریں۔