لاہور کے علاقے بھیکے وال پنڈ میں ایک افسوسناک واقعہ پیش آیا جہاں گھر میں پالی گئی شیرنی کے حملے کے نتیجے میں 8 سالہ معصوم بچی زخمی ہو گئی۔
پولیس کے مطابق بچی کو کان، گردن اور ٹانگ پر گہرے زخم آئے، جس کے بعد اسے فوری طور پر قریبی اسپتال منتقل کر دیا گیا، جہاں اس کی حالت خطرے سے باہر بتائی جا رہی ہے۔پولیس حکام کا کہنا ہے کہ واقعہ اس وقت پیش آیا جب شیرنی کسی طرح قابو سے باہر ہو گئی اور قریب موجود بچی پر حملہ کر دیا۔ زخمی بچی کے اہلِ خانہ نے فوری طور پر پولیس کو اطلاع دی، جس پر پولیس اور محکمہ وائلڈ لائف کی ٹیمیں موقع پر پہنچ گئیں۔
ترجمان ڈی آئی جی آپریشنز کے مطابق ابتدائی تحقیقات سے معلوم ہوا ہے کہ ایک شہری نے غیر قانونی طور پر گھر میں شیرنی پال رکھی تھی۔ واقعے کے بعد ملزمان شیرنی کو ساتھ لے کر فرار ہو گئے۔ پولیس کا کہنا ہے کہ شیرنی کے مالک کی گرفتاری کے لیے مختلف مقامات پر چھاپے مارے جا رہے ہیں اور جلد ملزمان کو قانون کی گرفت میں لے لیا جائے گا۔
محکمہ وائلڈ لائف کے حکام نے واقعے پر شدید تشویش کا اظہار کرتے ہوئے کہا ہے کہ جنگلی جانوروں کو گھروں میں پالنا نہ صرف غیر قانونی بلکہ انسانی جانوں کے لیے انتہائی خطرناک ہے۔ انہوں نے واضح کیا کہ وائلڈ لائف قوانین کی خلاف ورزی کرنے والوں کے خلاف سخت قانونی کارروائی کی جائے گی۔