لاہور: خاتون سے مبینہ اجتماعی زیادتی، مقدمہ درج، ملزمان گرفتار نہ ہو سکے

لاہور کے علاقے گجر پورہ میں ایک خاتون نے تین افراد پر مبینہ اجتماعی زیادتی کا الزام عائد کرتے ہوئے پولیس کو درخواست دے دی، جس پر مقدمہ درج کر لیا گیا ہے۔

پولیس کے مطابق متاثرہ خاتون نے اپنے بیان میں مؤقف اختیار کیا ہے کہ تقریباً ایک ماہ قبل وہ عینو بھٹیاں گاؤں سے کرول پنڈ اپنے گھر جا رہی تھی کہ راستے میں تین افراد نے اسے مبینہ طور پر زبردستی روک لیا۔ خاتون کے مطابق دو ملزمان اسے قریبی کھیت میں لے گئے جہاں انہوں نے مبینہ طور پر اجتماعی زیادتی کی، جبکہ تیسرا شخص موقع پر پہرا دیتا رہا۔ خاتون نے یہ بھی الزام لگایا کہ ملزمان نے واقعے کی ویڈیو بھی بنائی۔متاثرہ خاتون کا کہنا ہے کہ اس نے واقعے کی فوری رپورٹ اس خوف سے درج نہیں کروائی کہ اس کی عزت اور ساکھ متاثر ہو سکتی ہے، تاہم بعد ازاں اس نے قانونی کارروائی کا فیصلہ کیا۔

پولیس حکام کا کہنا ہے کہ خاتون کی درخواست پر مقدمہ درج کر لیا گیا ہے اور واقعے کے مختلف پہلوؤں کی تحقیقات جاری ہیں۔ پولیس کے مطابق تاحال کسی ملزم کی گرفتاری عمل میں نہیں آ سکی، تاہم ملزمان کی تلاش کے لیے کارروائیاں جاری ہیں۔پولیس کا مزید کہنا ہے کہ تحقیقات مکمل ہونے اور شواہد سامنے آنے کے بعد ہی واقعے کی حقیقت کا تعین کیا جا سکے گا۔