منگلا جھیل سے ملنے والی لاش کا معمہ حل، نانا اور ماموں گرفتار

‎میرپور آزاد کشمیر میں منگلا جھیل سے برآمد ہونے والی لاش کے کیس میں اہم پیش رفت سامنے آئی ہے، جہاں پولیس نے مقتول کی شناخت کرنے کے بعد قتل کے الزام میں اس کے حقیقی نانا اور تین ماموں کو گرفتار کرلیا۔
‎ایس ایس پی میرپور خرم اقبال نے پریس کانفرنس کرتے ہوئے بتایا کہ منگلا جھیل سے ملنے والی لاش کی شناخت شہزاد ایوب کے نام سے ہوئی ہے، جس کا تعلق سوات سے تھا۔ پولیس نے شواہد اکٹھے کرنے اور تحقیقات کے بعد ملزمان کو گرفتار کرلیا ہے جبکہ کیس کی مزید تفتیش جاری ہے۔
‎ایس ایس پی کے مطابق ابتدائی تحقیقات سے معلوم ہوا ہے کہ شہزاد ایوب کو اس کے حقیقی نانا اور تین ماموں نے مبینہ طور پر قتل کیا۔ ملزمان نے قتل کی ایک وجہ پولیس کو بتائی ہے، تاہم تاحال اس دعوے کی تصدیق کے لیے شواہد سامنے نہیں آسکے۔
‎پولیس حکام کا کہنا ہے کہ مقتول اور ملزمان گزشتہ تقریباً 15 سال سے ایک کرائے کے مکان میں رہائش پذیر تھے۔ منگلا جھیل سے لاش کی برآمدگی کے بعد پولیس نے شناخت اور شواہد کے حصول کے لیے تحقیقات کا آغاز کیا، جس کے نتیجے میں مقتول کی شناخت ممکن ہوئی اور مبینہ طور پر قتل میں ملوث افراد تک رسائی حاصل کی گئی۔
‎ایس ایس پی خرم اقبال کے مطابق گرفتار ملزمان سے مزید تفتیش جاری ہے اور قتل کے محرکات سمیت واقعے کے تمام پہلوؤں کا جائزہ لیا جا رہا ہے۔ پولیس کا کہنا ہے کہ تحقیقات مکمل ہونے کے بعد مزید حقائق سامنے آنے کا امکان ہے۔