سرگودھا: امراضِ قلب کے علاج کے شعبے میں نواز شریف انسٹیٹیوٹ آف کارڈیالوجی سرگودھا نے اہم سنگِ میل عبور کرلیا، جہاں پہلی مرتبہ مریض کے دل میں پیس میکر کامیابی سے نصب کردیا گیا۔
یہ اہم طبی کامیابی ایچ او ڈی کارڈیالوجی ڈاکٹر اویس اور ان کی ماہر طبی ٹیم کی کاوشوں سے حاصل ہوئی۔ پیس میکر ایسے مریضوں کیلئے انتہائی اہم طبی سہولت ہے جن کے دل کی دھڑکن غیر معمولی طور پر سست ہوجائے یا دل کے قدرتی برقی نظام میں خرابی پیدا ہوجائے۔
پیس میکر کی کامیاب تنصیب کے بعد سرگودھا اور گردونواح کے مریضوں کو اس علاج کیلئے لاہور، اسلام آباد اور دیگر بڑے شہروں کا سفر کرنے کی ضرورت کم ہوجائے گی۔ مقامی سطح پر یہ سہولت دستیاب ہونے سے دل کے مریضوں کو بروقت اور جدید علاج کی سہولت میسر آئے گی۔
نواز شریف انسٹیٹیوٹ آف کارڈیالوجی سرگودھا میں الیکٹرو فزیالوجی کیتھ لیب کا افتتاح اور اس میں پہلے پیس میکر کی کامیاب تنصیب علاقے میں جدید امراضِ قلب کے علاج کی جانب ایک اہم پیش رفت قرار دی جارہی ہے۔
طبی ماہرین کے مطابق اس سہولت سے نہ صرف مریضوں کو علاج کی بہتر سہولت ملے گی بلکہ انہیں بڑے شہروں کے ہسپتالوں میں علاج کیلئے طویل سفر اور اضافی اخراجات سے بھی کسی حد تک نجات مل سکے گی۔
ڈاکٹر اویس، ان کی طبی ٹیم اور نواز شریف انسٹیٹیوٹ آف کارڈیالوجی سرگودھا کی انتظامیہ اس اہم طبی کامیابی پر مبارکباد کی مستحق ہے۔ یہ پیش رفت اہلِ سرگودھا اور گردونواح کے مریضوں کیلئے امید، آسان رسائی اور جدید طبی سہولیات کی جانب ایک مثبت قدم ہے۔