ترجمان دفتر خارجہ طاہر اندرابی نے واضح کیا ہے کہ قانونی ویزا یا دیگر درست سفری دستاویزات رکھنے والے کسی بھی افغان شہری کو پاکستان سے بے دخل نہیں کیا گیا۔ انہوں نے کہا کہ حکومت امیگریشن سے متعلق تمام معاملات قانون اور بین الاقوامی اصولوں کے مطابق نمٹا رہی ہے۔
ہفتہ وار پریس بریفنگ کے دوران ترجمان نے بتایا کہ افغان سٹیزنز ری سیٹلمنٹ پروگرام (IFRP) کے تحت تقریباً 89 ہزار افغان شہریوں کے کیسز پر کارروائی جاری ہے۔ ان کے مطابق متعلقہ ادارے درخواستوں کا جائزہ لے رہے ہیں اور ہر کیس کو مقررہ طریقہ کار کے مطابق نمٹایا جا رہا ہے۔
طاہر اندرابی نے کہا کہ انسانی ہمدردی کی بنیاد پر تقریباً 16 ہزار افغان خواتین، بچوں اور بزرگ شہریوں کے پاکستان میں قیام میں توسیع کی جا رہی ہے تاکہ انہیں درپیش مشکلات کو مدنظر رکھتے ہوئے مناسب سہولت فراہم کی جا سکے۔
سرحدی صورتحال سے متعلق سوال کے جواب میں ترجمان دفتر خارجہ نے کہا کہ چترال کے قریب سرحدی علاقوں میں پیش آنے والے مبینہ واقعے کے بارے میں فی الحال کوئی مصدقہ معلومات دستیاب نہیں ہیں۔ انہوں نے کہا کہ افغانستان سے آنے والی اطلاعات کی زمینی سطح پر تصدیق ضروری ہے، اس لیے غیر مصدقہ رپورٹس پر تبصرہ کرنا مناسب نہیں ہوگا۔
انہوں نے اس بات پر زور دیا کہ پاکستان خطے میں امن، استحکام اور ذمہ دارانہ سفارت کاری کے اصولوں پر کاربند ہے، جبکہ سرحدی معاملات اور امیگریشن سے متعلق تمام فیصلے ملکی قوانین اور بین الاقوامی ذمہ داریوں کو مدنظر رکھتے ہوئے کیے جاتے ہیں۔
قانونی ویزا رکھنے والے کسی افغان شہری کو پاکستان سے بے دخل نہیں کیا گیا، دفتر خارجہ
