اسکاٹ لینڈ، ویلز اور شمالی آئرلینڈ کے رہنما برطانیہ سے علیحدگی اور آزادی کے لیے مشترکہ حکمت عملی طے کرنے کی غرض سے اہم اجلاس میں شرکت کریں گے، جس کے بعد برطانیہ کے اتحاد اور مستقبل کے آئینی ڈھانچے سے متعلق بحث مزید شدت اختیار کرنے کا امکان ہے۔
غیر ملکی خبر رساں ایجنسی کے مطابق کارڈف میں ہونے والے اس غیر معمولی اجلاس میں تینوں خطوں کے فرسٹ منسٹرز ایک مشترکہ اعلامیے پر دستخط کریں گے۔ اعلامیے میں آزادی کے ریفرنڈم کے انعقاد کے حق کا مطالبہ کیا جائے گا، جبکہ تینوں خطوں کے رہنما اپنے اپنے ممالک کے حق خود ارادیت کے لیے برطانیہ پر سیاسی دباؤ بڑھانے کی کوشش کریں گے۔
اجلاس میں آئرلینڈ کی مرکزی اپوزیشن جماعت شِن فین کی رہنما میری لو میک ڈونلڈ بھی شریک ہوں گی۔ اس موقع پر اسکاٹ لینڈ، ویلز اور شمالی آئرلینڈ کے رہنما برطانیہ کے آئینی مستقبل، اپنے خطوں کے حق خود ارادیت اور آزادی کے لیے آئندہ کی حکمت عملی پر تبادلہ خیال کریں گے۔
اسکاٹ لینڈ کے فرسٹ منسٹر جان سوئنی نے کہا ہے کہ پہلی مرتبہ اسکاٹ لینڈ، ویلز اور شمالی آئرلینڈ میں آزادی کے حامی فرسٹ منسٹرز حکومت میں ہیں، جو اس بات کا واضح اشارہ ہے کہ موجودہ صورتحال پائیدار نہیں۔ انہوں نے برطانوی وزیراعظم اینڈی برنہم کو مخاطب کرتے ہوئے کہا کہ انہیں اس امکان کا سامنا کرنا ہوگا کہ تاریخ انہیں برطانیہ کا آخری وزیراعظم قرار دے۔
یہ پیش رفت ایسے وقت میں سامنے آئی ہے جب برطانوی وزیراعظم اینڈی برنہم نے پارلیمنٹ میں کہا تھا کہ اگر اسکاٹ لینڈ میں آزادی کے لیے واضح عوامی اتفاق رائے سامنے آیا تو ایک اور آزادی ریفرنڈم کی اجازت دی جاسکتی ہے۔
دوسری جانب امریکی صدر ڈونلڈ ٹرمپ نے بھی متحدہ آئرلینڈ کی حمایت کرتے ہوئے کہا ہے کہ وہ آئرلینڈ کو متحد دیکھنا پسند کریں گے۔ ان کا کہنا تھا کہ شمالی آئرلینڈ کا جمہوریہ آئرلینڈ میں شامل ہونا ایک اچھی بات ہوگی۔
برطانوی میڈیا کے مطابق مئی کے انتخابات کے بعد پہلی مرتبہ تینوں خودمختار خطوں میں آزادی کے حامی جماعتیں اقتدار میں آئی ہیں، جس کے باعث برطانیہ کے اتحاد، موجودہ سیاسی صورتحال اور مستقبل کے آئینی ڈھانچے سے متعلق بحث مزید تیز ہوگئی ہے۔
گڈ فرائیڈے معاہدے کے تحت شمالی آئرلینڈ میں آئرلینڈ کے ساتھ اتحاد کے حوالے سے ریفرنڈم کا راستہ بھی موجود ہے۔ تاہم اس کے لیے یہ امکان ظاہر ہونا ضروری ہے کہ شمالی آئرلینڈ کے عوام کی اکثریت برطانیہ سے علیحدگی اور جمہوریہ آئرلینڈ کے ساتھ اتحاد کے حق میں ووٹ دے سکتی ہے۔