مردان: پاک فضائیہ کا ایک تربیتی طیارہ معمول کی تربیتی پرواز کے دوران مردان کے قریب حادثے کا شکار ہوگیا، جس کے نتیجے میں پاک فضائیہ اور پاک بحریہ کے دو افسران شہید ہوگئے۔
پاک فوج کے شعبۂ تعلقات عامہ (آئی ایس پی آر) کے مطابق حادثہ معمول کی تربیتی پرواز کے دوران پیش آیا۔ حادثے میں پاک فضائیہ کے فلائٹ لیفٹیننٹ محمد قاسم عبداللہ اور پاک بحریہ کے لیفٹیننٹ طہٰ عباسی شہید ہوگئے۔آئی ایس پی آر نے بتایا کہ حادثے کے فوری بعد متعلقہ اداروں نے ضروری کارروائی کا آغاز کردیا، جبکہ واقعے کی وجوہات جاننے کے لیے تحقیقات بھی شروع کردی گئی ہیں۔
ادھر فیلڈ مارشل سید عاصم منیر، سروسز چیفس اور مسلح افواج کے افسران و جوانوں نے اس المناک حادثے پر گہرے رنج و غم کا اظہار کیا ہے۔ عسکری قیادت نے شہداء کی پیشہ ورانہ خدمات کو خراجِ عقیدت پیش کرتے ہوئے ان کے اہلِ خانہ سے دلی ہمدردی اور تعزیت کا اظہار کیا۔آئی ایس پی آر کے مطابق پوری قوم شہید افسران کی قربانیوں کو قدر کی نگاہ سے دیکھتی ہے اور ان کی خدمات ہمیشہ یاد رکھی جائیں گی۔
پاک بحریہ کے سربراہ ایڈمرل نوید اشرف نے پاک بحریہ کے لیفٹیننٹ طحہٰ عباسی اور پاک فضائیہ کے فلائٹ لیفٹیننٹ محمد قاسم عبداللہ کے المناک نقصان پر گہرے دکھ اور افسوس کا اظہار کیا ہے جنہوں نے آج مردان کے قریب معمول کی تربیت کے دوران ڈیوٹی کے دوران شہادت قبول کی۔نیول چیف نے جوان افسران کو مٹی کے بہادر بیٹے قرار دیتے ہوئے کہا کہ ڈیوٹی کے دوران ان کی عظیم قربانی ہماری مسلح افواج کی اعلیٰ روایات کی عکاسی کرتی ہے۔چیف آف دی نیول اسٹاف نے شہدا کے سوگوار خاندانوں سے دلی تعزیت کا اظہار بھی کیا۔
وزیراعظم شہباز شریف نے مردان کے قریب پاک فضائیہ کے تربیتی طیارے کے حادثے پر گہرے دکھ اور افسوس کا اظہار کرتے ہوئے حادثے میں شہید ہونے والے پاک فضائیہ کے فلائٹ لیفٹیننٹ محمد قاسم عبداللہ اور پاک بحریہ کے لیفٹیننٹ طحہٰ عباسی کو خراجِ عقیدت پیش کیا ہے۔وزیراعظم نے اپنے بیان میں شہدا کے بلند درجات اور اہل خانہ کے لیے صبر جمیل کی دعا کرتے ہوئے کہا کہ وہ فلائٹ لیفٹیننٹ محمد قاسم عبداللہ اور لیفٹیننٹ طحہٰ عباسی کےاہلخانہ کے غم میں برابر کے شریک ہیں، اللہ تعالیٰ شہدا کو جوارِ رحمت میں جگہ عطا فرمائے اور لواحقین کو یہ صدمہ برداشت کرنے کا حوصلہ دے وطن کے دفاع کے لیے پاک افواج کی پیشہ ورانہ مہارت، عزم اور خدمات بے مثال ہیں، جبکہ قوم اپنے بہادر سپوتوں کی قربانیوں کو ہمیشہ یاد رکھے گی۔
صدرِ مملکت آصف علی زرداری نے مردان کے قریب پاک فضائیہ کے تربیتی طیارے کے حادثے پر گہرے دکھ اور افسوس کا اظہار کرتے ہوئے شہید ہونے والے فلائٹ لیفٹیننٹ محمد قاسم عبداللہ اور لیفٹیننٹ طحہٰ عباسی کو خراجِ عقیدت پیش کیا ہے۔ صدر مملکت نے اپنے بیان میں دونوں شہدا کے درجاتِ بلندی کے لیے دعا کرتے ہوئے کہا کہ قوم وطن کے دفاع کے لیے اپنی جانوں کا نذرانہ پیش کرنے والے بہادر سپوتوں کی قربانیوں کو ہمیشہ یاد رکھے گی شہدا کے اہلِخانہ کے لیے صبرِ جمیل کی دعا کی اور غمزدہ خاندانوں سے دلی ہمدردی اور تعزیت کا اظہار کیاصدر مملکت نے کہا کہ وطن کے تحفظ اور سلامتی کے لیے مسلح افواج کے جوانوں کی قربانیاں قوم کا قیمتی سرمایہ ہیں اور پوری قوم اپنے شہدا کو سلام پیش کرتی ہے۔