پاکستان نے بھارتی رجسٹرڈ طیاروں اور بھارتی ایئر لائنز یا آپریٹرز کے زیرِ انتظام، ملکیت یا لیز پر لیے گئے تمام طیاروں، بشمول فوجی پروازوں، کے لیے اپنی فضائی حدود پر عائد پابندی میں مزید توسیع کر دی ہے۔
پاکستان ایئرپورٹس اتھارٹی نے حکومتی ہدایات کے مطابق نیا نوٹم (NOTAM) جاری کر دیا ہے، جس کے تحت یہ پابندی اب 24 اگست 2026 تک نافذ العمل رہے گی۔ نوٹم کے مطابق بھارتی رجسٹرڈ طیاروں اور بھارتی ایئر لائنز کی پروازوں کو اس مدت کے دوران پاکستان کی فضائی حدود استعمال کرنے کی اجازت نہیں ہوگی۔
اعلامیے میں کہا گیا ہے کہ پابندی کا اطلاق بھارتی رجسٹرڈ سول طیاروں کے علاوہ ان تمام طیاروں پر بھی ہوگا جو بھارتی ایئر لائنز یا آپریٹرز کی ملکیت، انتظام یا لیز کے تحت چلائے جا رہے ہیں، جبکہ فوجی پروازیں بھی اس پابندی کے دائرہ کار میں شامل رہیں گی۔
یاد رہے کہ پاکستان نے 23 اپریل 2025 کو بھارت کے لیے اپنی فضائی حدود بند کرنے کا فیصلہ کیا تھا۔ اس کے بعد سے حکومت مختلف ادوار میں جاری ہونے والے نوٹمز کے ذریعے اس پابندی میں توسیع کرتی آ رہی ہے۔
فضائی ماہرین کے مطابق اس پابندی کے باعث بھارتی ایئر لائنز کو اپنی متعدد بین الاقوامی پروازوں کے لیے متبادل فضائی راستے اختیار کرنا پڑتے ہیں، جس سے پروازوں کے دورانیے، ایندھن کے اخراجات اور آپریشنل لاگت میں اضافہ ہو سکتا ہے۔
پاکستان ایئرپورٹس اتھارٹی کی جانب سے جاری تازہ نوٹم کے مطابق پابندی 24 اگست 2026 تک برقرار رہے گی، تاہم مستقبل میں حالات اور حکومتی فیصلوں کے مطابق اس میں مزید توسیع یا تبدیلی کی جا سکتی ہے۔
پاکستان نے بھارتی طیاروں کے لیے فضائی حدود کی بندش میں توسیع کر دی
