پاکستان کی معاشی ترقی کی راہ میں ایک اور سنگِ میل

اسلام آباد: پاکستان کے مالیاتی شعبے میں ایک اور بڑی پیش رفت سامنے آئی ہے، جہاں کویت کے تعاون سے رقمی اسلامک ڈیجیٹل بینک کے قیام کا اعلان کیا گیا ہے۔ یہ جدید اور مکمل طور پر ڈیجیٹل اسلامی بینک آئندہ ماہ پاکستان میں اپنے باقاعدہ آپریشنز کا آغاز کرے گا۔ حکام کے مطابق ابتدائی مرحلے میں بینک میں 10 کروڑ امریکی ڈالر کی سرمایہ کاری کی جا رہی ہے، جسے پاکستان کی بہتر ہوتی معاشی صورتحال اور جاری اصلاحاتی عمل پر عالمی اعتماد کا واضح اظہار قرار دیا جا رہا ہے۔

ذرائع کے مطابق رقمی اسلامک ڈیجیٹل بینک کو کویت انویسٹمنٹ اتھارٹی (KIA) کی معاونت حاصل ہے، جبکہ اسپیشل انویسٹمنٹ فسیلیٹیشن کونسل (SIFC) نے اس منصوبے کی مؤثر سہولت کاری میں کلیدی کردار ادا کیا۔ ماہرین کا کہنا ہے کہ یہ منصوبہ پاکستان کے مالیاتی شعبے کے لیے ایک اہم سنگِ میل ثابت ہوگا، جو نہ صرف اسلامی بینکاری کے فروغ میں مدد دے گا بلکہ ڈیجیٹل معیشت کے استحکام میں بھی نمایاں کردار ادا کرے گا۔مشیرِ وزیر خزانہ خرم شہزاد نے اس موقع پر اپنے بیان میں کہا کہ یہ سرمایہ کاری پاکستان کی معاشی سمت، مالیاتی اصلاحات اور پالیسی تسلسل پر بڑھتے ہوئے بین الاقوامی اعتماد کی عکاس ہے۔ ان کا کہنا تھا کہ پاکستان اور کویت کے درمیان مالیاتی، سرمایہ کاری اور ڈیجیٹل معیشت کے شعبوں میں تعاون مسلسل مضبوط ہو رہا ہے، جو مستقبل میں مزید مشترکہ منصوبوں کی راہ ہموار کرے گا۔خرم شہزاد کے مطابق رقمی اسلامک ڈیجیٹل بینک پاکستان میں ڈیجیٹل تبدیلی (Digital Transformation) کے عمل کو تیز کرے گا اور جدید ٹیکنالوجی کے ذریعے بینکاری نظام کو زیادہ مؤثر، شفاف اور عوام دوست بنائے گا۔ انہوں نے کہا کہ ڈیجیٹل بینکاری کا بنیادی مقصد زیادہ سے زیادہ افراد، خصوصاً نوجوانوں اور دور دراز علاقوں میں رہنے والی آبادی کو مالیاتی نظام سے جوڑنا ہے تاکہ مالی شمولیت (Financial Inclusion) کو فروغ دیا جا سکے۔

حکام کے مطابق رقمی بینک مکمل طور پر ڈیجیٹل اسلامی بینک کے طور پر کام کرے گا، جہاں شریعہ کے مطابق جدید مالیاتی مصنوعات اور خدمات فراہم کی جائیں گی۔ اس اقدام سے نہ صرف اسلامی بینکاری کے شعبے میں مسابقت بڑھے گی بلکہ پاکستان کو خطے میں ڈیجیٹل اسلامی مالیات کے ایک ابھرتے ہوئے مرکز کے طور پر متعارف کرانے میں بھی مدد ملے گی۔ماہرین معاشیات کا کہنا ہے کہ ایس آئی ایف سی کی مؤثر سہولت کاری کے باعث پاکستان میں جدید اور پائیدار مالیاتی نظام کی بنیاد مضبوط ہو رہی ہے۔ عالمی سرمایہ کاروں کی دلچسپی اس بات کا ثبوت ہے کہ پاکستان اصلاحات کے درست راستے پر گامزن ہے اور مستقبل قریب میں مزید غیر ملکی سرمایہ کاری متوقع ہے، جو مجموعی معاشی ترقی، روزگار کے مواقع اور مالیاتی استحکام میں اہم کردار ادا کرے گی۔