مرکزی مسلم لیگ کے صدر خالد مسعود سندھو نے کہا ہے کہ بھارت کی جانب سے دریائے چناب پرسرنگ بنانے کا منصوبہ بھارتی آبی جارحیت کی واضح مثال ہے، بھارت ہٹ دھرمی سے باز نہیں آ رہا، پاکستان کو پانیوں کے تحفظ کے لئے مضبوط مؤقف اختیار کرنا ہو گا، بھارتی آبی جارحیت کے خلاف عالمی سطح پر بھی آواز اٹھائی جائے،
خالد مسعود سندھو کا کہنا تھا کہ مودی سرکار نے بین الاقوامی قوانین کو پاؤں تلے روندتے ہوئے سندھ طاس معاہدہ کی معطلی کا فیصلہ کیا اب بھارت نے دریائے چناب پر ایک اور متنازع منصوبے پر کام شروع کرنے کا فیصلہ کیا ہے،بھارتی وزارتِ ماحولیات نے ضلع کشتواڑ میں 3,277 کروڑ بھارتی روپے سے زائد کی مالیت کے 260 میگاواٹ کے ‘دلہستی اسٹیج-II’ رن آف دی ریور پن بجلی منصوبے کی منظوری دی ہے، جس کے تحت ایک علیحدہ ڈائیورژن سرنگ اور نیا ذخیرۂ آب تعمیر کیا جائے گا،مودی سرکار کی جانب سے پاکستان کی جانب آنے والے دریاؤں کا پانی روکنے کی کوشش بھارتی آبی دہشتگردی ہے،بھارت جب چاہتا ہے پانی روک لیتا ہے اور جب چاہے پاکستان کی طرف پانی چھوڑ دیتا ہے، دونوں صورتوں میں پاکستان کا نقصان ہوتا ہے، ایسی صورتحال میں حکمرانوں کو آنکھیں بند کرنے کی بجائے واضح لائحہ عمل کا اعلان کرنا چاہئے،پانی زندگی ہے اور پاکستان کو اپنے پانیوں کے تحفظ کا اعلان کرنا چاہئے،پاکستان عالمی سطح پر بھارتی آبی دہشتگردی کے خلاف آواز بلند کرے، مرکزی مسلم لیگ بھی بھارتی آبی دہشتگردی کے خلاف قوم کو متحد و بیدار کرے گی.