پاکستان کو ایران اور امریکا کے درمیان جاری مذاکرات کی سربراہی کی پیشکش کیے جانے کی اطلاعات سامنے آئی ہیں، جسے خطے میں پاکستان کے بڑھتے ہوئے سفارتی کردار کی ایک اہم پیش رفت قرار دیا جا رہا ہے۔
ذرائع کے مطابق سوئٹزرلینڈ کے علاقے برگن اسٹاک میں وزیراعظم شہباز شریف اور فیلڈ مارشل سید عاصم منیر کی قیادت میں موجود پاکستانی وفد سے ایران اور امریکا کے اعلیٰ سطحی وفود نے الگ الگ ملاقاتیں کیں۔ ان ملاقاتوں کے دوران دونوں ممالک کی جانب سے پاکستان کو مذاکراتی عمل کی سربراہی کی پیشکش کی گئی۔
ذرائع کا کہنا ہے کہ اس پیشکش کا مقصد ایران اور امریکا کے درمیان جاری مذاکرات کو مزید مؤثر انداز میں آگے بڑھانا اور باہمی اعتماد کو مضبوط بنانا ہے۔ تاہم اس حوالے سے پاکستان، ایران یا امریکا کی جانب سے ابھی تک کوئی باضابطہ سرکاری بیان جاری نہیں کیا گیا۔
ایرانی وفد کی نمائندگی اسپیکر محمد باقر قالیباف اور وزیر خارجہ عباس عراقچی نے کی، جبکہ پاکستانی وفد میں وزیراعظم شہباز شریف، فیلڈ مارشل سید عاصم منیر اور وفاقی وزیر داخلہ محسن نقوی بھی شریک تھے۔
ملاقات کے دوران پاکستانی اور ایرانی قیادت نے ایک دوسرے کا پرتپاک استقبال کیا اور گرمجوشی سے مصافحہ و معانقہ کیا۔ اس سے قبل امریکی وفد نے بھی پاکستانی وفد سے ملاقات کی، جس میں مذاکراتی عمل، علاقائی صورتحال اور امن و استحکام سے متعلق مختلف امور پر تبادلہ خیال کیا گیا۔
تجزیہ کاروں کے مطابق اگر پاکستان کو باضابطہ طور پر مذاکرات کی سربراہی سونپی جاتی ہے تو یہ عالمی سطح پر پاکستان کی سفارتی حیثیت اور اعتماد میں ایک اہم اضافہ ہوگا۔ ماہرین کا کہنا ہے کہ پاکستان نے حالیہ عرصے میں خطے میں کشیدگی کم کرنے اور مذاکرات کے فروغ کے لیے فعال سفارتی کردار ادا کیا ہے، جسے مختلف ممالک کی جانب سے سراہا جا رہا ہے۔
پاکستان کو ایران امریکا مذاکرات کی سربراہی کی پیشکش
