امریکی ناکہ بندی ،پاکستانی جھنڈے والا آئل ٹینکر آبنائے ہرمز عبور کر گیا

پاکستانی جھنڈے والے آئل ٹینکر نے آبنائے ہرمز عبور کر لیا ہے، جسے امریکی ناکہ بندی کے بعد خام مال کے ساتھ اس راستے سے گزرنے والا پہلا جہاز قرار دیا جا رہا ہے۔

امریکی جریدے بلومبرگ کی رپورٹ کے مطابق یہ پیش رفت خطے میں بڑھتی کشیدگی اور سمندری نگرانی کے ماحول میں سامنے آئی ہے۔رپورٹ میں بتایا گیا ہے کہ پاکستانی پرچم بردار آئل ٹینکر کامیابی کے ساتھ آبنائے ہرمز سے گزرا، جبکہ یہ جہاز گزشتہ ہفتے کے آخر میں خلیج فارس میں داخل ہوا تھا۔ ماہرین کے مطابق یہ پیش رفت عالمی توانائی منڈیوں اور خطے کی بحری سرگرمیوں کے لیے اہم سمجھی جا رہی ہے۔

دوسری جانب امریکی سینٹرل کمانڈ (سینٹکام) نے کہا ہے کہ امریکی بحری افواج ایرانی بندرگاہوں میں داخل ہونے یا وہاں سے روانہ ہونے والے جہازوں پر عائد پابندیوں کے نفاذ کے دوران مسلسل نگرانی کر رہی ہیں۔ سینٹکام کے مطابق خلیج عمان میں متعدد جہازوں کا رخ بھی موڑا جا چکا ہے۔سینٹکام نے سوشل میڈیا پلیٹ فارم ایکس پر جاری بیان میں کہا کہ گائیڈڈ میزائل ڈسٹرائر یو ایس ایس ڈیلبرٹ ڈی بلیک (DDG-119) پر تعینات اہلکار مکمل چوکس ہیں اور امریکی افواج ایرانی بندرگاہوں اور ساحلی علاقوں میں داخل یا وہاں سے روانہ ہونے والے جہازوں کے خلاف ناکہ بندی برقرار رکھے ہوئے ہیں۔بیان کے مطابق طیارہ بردار جہاز یو ایس ایس ابراہام لنکن (CVN-72) بحیرہ عرب میں ناکہ بندی کی کارروائیوں میں شریک ہے۔ اس جنگی جہاز کے ایئر ونگ میں ایف-35 سی اسٹیلتھ فائٹر طیارے، ایف/اے-18 جیٹ، ای اے-18 جی الیکٹرانک حملہ آور طیارے، ای-2 ڈی کمانڈ اینڈ کنٹرول طیارے، ہیلی کاپٹرز اور لاجسٹک معاون طیارے شامل ہیں۔

سینٹکام نے ایک آڈیو اور ویڈیو بھی جاری کی ہے، جس میں امریکی بحریہ کے اہلکار ایک ڈسٹرائر سے تجارتی جہازوں کو ایرانی بندرگاہوں کی جانب واپس جانے کا حکم دیتے دکھائی دیتے ہیں۔ حکام کے مطابق یہ آپریشن خطے میں کشیدگی کے دوران وسیع تر سمندری نگرانی اور نفاذی اقدامات کا حصہ ہے۔جاری کردہ فوٹیج میں یو ایس ایس مائیکل مرفی (DDG-112) سے لی گئی ویڈیو بھی شامل ہے، جس میں خلیج عمان کے اوپر ہیلی کاپٹر کے ذریعے فضائی نگرانی دکھائی گئی ہے۔