پانی روکنے کی کوشش کی گئی تو قومی قیادت موثر جواب دینے کیلئے پر عزم ہے،عطا تارڑ

وفاقی وزیر اطلاعات عطا تارڑ نے کہا ہے کہ سندھ طاس معاہدہ، امن اور علاقائی استحکام کا ایک اہم زریعہ” کے موضوع پر سیمینار سے خطاب میرے لئے اعزاز ہے۔

عطا تارڑ کا کہنا تھا کہ آج ہم ایک معاہدے پر نہیں بلکہ پاکستان کے 24 کروڑ عوام کی زندگی کی شہہ رگ پر بات کررہے ہیں۔ وادی سندھ کی تہذیب ہی ہماری اصل شناخت اور ہم اس عظیم تہذیب کے وارث ہیں۔پاکستان کیلئے پانی صرف ایک قدرتی وسیلہ نہیں بلکہ زندگی کا مسئلہ ہے،ہزاروں برس سے دریائے سندھ کا نظام دنیا کی قدیم ترین تہذیبوں میں سے ایک کی آبیاری کرتا آیا ہے۔ پاکستان کی تاریخ دراصل دریائے سندھ کی تاریخ ہے۔ زراعت قومی معیشت کا بنیادی ستون اور دریائے سندھ اسکی شہہ رگ ہے۔ چھ دہائیاں قبل دو ممالک نے ایک غیر معمولی فیصلہ کیا۔ فیصلے کے نتیجے میں سب سے پائیدار آبی معاہدوں میں سے ایک وجود میں آیا، پاکستان نے ہمیشہ پُرامن روابط، تعمیری مزاکرات اور معاہدے پر مخلصانہ عملدرآمد کے عزم کا مظاہرہ کیا۔ پانی روکنے کی کوشش کی گئی تو قومی قیادت پاکستان کے عوام کا حق بحال کرنے اور موثر جواب دینے کیلئے پر عزم ہے۔