حکومت نے رات گئے پیٹرولیم مصنوعات کی قیمتوں میں بڑا اضافہ کر دیا، جس کے بعد عوام پر مہنگائی کا ایک اور بوجھ ڈال دیا گیا ہے۔
وزیرِ پیٹرولیم علی پرویز ملک نے وزیر خزانہ کے ہمراہ پریس کانفرنس کرتے ہوئے اعلان کیا کہ پیٹرول کی قیمت میں 137 روپے 23 پیسے فی لیٹر اضافہ کیا گیا ہے، جس کے بعد نئی قیمت 458 روپے 40 پیسے فی لیٹر مقرر کر دی گئی ہے۔
اسی طرح ڈیزل کی قیمت بھی بڑھا دی گئی ہے اور اس کی نئی قیمت 520 روپے 35 پیسے فی لیٹر مقرر کی گئی ہے، جس سے ٹرانسپورٹ اور اشیائے ضروریہ کی قیمتوں میں مزید اضافے کا خدشہ ظاہر کیا جا رہا ہے۔
وزیرِ پیٹرولیم کا کہنا تھا کہ مشرقِ وسطیٰ میں جاری جنگ کے باعث توانائی کی عالمی منڈی میں شدید اتار چڑھاؤ آیا ہے، جس کے اثرات پاکستان سمیت دیگر ممالک پر بھی پڑ رہے ہیں۔
انہوں نے کہا کہ خام تیل کی قیمتوں میں ریکارڈ اضافہ ہوا ہے جس کے باعث حکومت کو یہ مشکل مگر ضروری فیصلہ کرنا پڑا۔
علی پرویز ملک نے بتایا کہ حکومت نے اس فیصلے سے قبل مختلف آپشنز پر غور کیا اور اتحادی جماعتوں، وزرائے اعلیٰ اور دیگر متعلقہ حکام سے مشاورت کی گئی۔
ان کا کہنا تھا کہ حکومت حالات کے پیش نظر ذمہ دارانہ فیصلے کر رہی ہے تاکہ معیشت کو سنبھالا جا سکے، تاہم اس کے اثرات سے عوام کو بھی گزرنا پڑے گا۔
اس بڑے اضافے کے بعد ملک بھر میں مہنگائی میں مزید اضافے اور عوامی ردعمل کا امکان ظاہر کیا جا رہا ہے۔
پیٹرول 137 روپے مہنگا، قیمت 458 روپے فی لیٹر ہوگئی
