ایران کے صدر مسعود پزشکیان نے کہا ہے کہ موجودہ علاقائی حالات میں ایران اور پاکستان کے درمیان مزید ہم آہنگی اور تعاون کی ضرورت پہلے سے کہیں زیادہ بڑھ گئی ہے۔ انہوں نے دونوں ممالک کے درمیان موجود دیرینہ تعلقات کو مزید مضبوط اور وسیع بنانے کے عزم کا اظہار کیا۔
ایک بیان میں ایرانی صدر نے پاکستان کے یوم آزادی کے موقع پر پاکستانی قوم کو خراج تحسین پیش کرتے ہوئے کہا کہ یہ دن پاکستان کی عظیم قوم کی کامیابیوں کو سراہنے کا ایک قیمتی موقع ہے۔ ان کا کہنا تھا کہ ایران اور پاکستان کے مشترکہ مفادات اور دونوں اقوام کی تقدیریں ایک دوسرے سے گہرا تعلق رکھتی ہیں۔
مسعود پزشکیان نے کہا کہ پاکستان کا یوم آزادی ایران اور پاکستان کے دیرینہ اور تزویراتی تعلقات کو مزید گہرا اور وسیع کرنے کے لیے ایک نئے موقع کی حیثیت رکھتا ہے۔ ایران پاکستان کے ساتھ اپنے جامع تعلقات کو مضبوط بنانے کے عزم پر قائم ہے اور باہمی تعاون کے مختلف شعبوں میں پیش رفت کے لیے تیار ہے۔
ایرانی صدر نے زور دیا کہ باہمی اعتماد، احترام اور دونوں ممالک کے درمیان موجود وسیع صلاحیتوں سے فائدہ اٹھا کر تعلقات کو مزید مستحکم بنایا جا سکتا ہے۔ انہوں نے کہا کہ تجارت، معیشت، توانائی، علاقائی روابط اور دیگر باہمی دلچسپی کے شعبوں میں تعاون بڑھانے کے لیے مزید مؤثر اقدامات کی ضرورت ہے۔
مسعود پزشکیان نے پاکستان کی ترقی، خوشحالی اور سربلندی کے لیے نیک خواہشات کا اظہار کرتے ہوئے امید ظاہر کی کہ ایران اور پاکستان کے درمیان برادرانہ تعلقات مستقبل میں مزید مضبوط اور مستحکم ہوں گے۔
انہوں نے کہا کہ دونوں ممالک کے درمیان قریبی رابطے اور مشترکہ مفادات پر تعاون نہ صرف ایران اور پاکستان بلکہ پورے خطے میں امن، استحکام اور ترقی کے لیے بھی اہم کردار ادا کر سکتا ہے۔
ایران پاکستان تعلقات مزید مضبوط بنانے کے لیے تعاون ناگزیر، مسعود پزشکیان
