وزیراعظم شہباز شریف اور چیف آف ڈیفنس فورسز (سی ڈی ایف) فیلڈ مارشل سید عاصم منیر امریکا اور ایران کے درمیان جاری اعلیٰ سطحی مذاکرات میں شرکت کے لیے سوئٹزرلینڈ کے شہر برگن اسٹاک پہنچ گئے ہیں-
وزیراعظم آفس کے مطابق دونوں اعلیٰ شخصیات 21 جون کو ہونے والے اہم مذاکرات میں شریک ہوں گی، جو امریکا اور ایران کے درمیان پہلے سے طے شدہ معاہدے کے فالو اپ کے طور پر منعقد کیے جا رہے ہیں، وزیراعظم شہباز شریف اس موقع پر ایک اعلیٰ سطحی پاکستانی وفد کی قیادت بھی کر رہے ہیں۔
دفتر خارجہ نے کہا ہے کہ ان مذاکرات میں ایران، قطر اور امریکا کے اعلیٰ سطحی وفود بھی شریک ہوں گے۔ ترجمان کے مطابق یہ اجلاس 17 جون کو طے پانے والے اسلام آباد میمورنڈم کے بعد پہلا باضابطہ سفارتی رابطہ ہے، جو خطے میں کشیدگی میں کمی کے لیے ایک اہم پیش رفت تصور کیا جا رہا ہے پاکستان ابتدا سے ہی امریکا اور ایران کے درمیان کشیدگی کم کرنے اور سفارتی حل تلاش کرنے میں سہولت کار کا کردار ادا کر رہا ہےاسلام آباد کی کوششیں ایک متوازن، اصولی اور تعمیری سفارتی حکمت عملی کی عکاس ہیں۔
مذاکرات کے موقع پر وزیراعظم شہباز شریف کی ایران، قطر، سوئٹزرلینڈ اور امریکا کے وفود سے الگ الگ ملاقاتیں بھی متوقع ہیں، جن میں خطے میں دیرپا امن اور مکالمے کے فروغ پر بات چیت کی جائے گی۔
دوسری جانب امریکی نائب صدر جے ڈی وینس بھی مذاکرات کے لیے سوئٹزرلینڈ پہنچ گئے ہیں، جبکہ ایران کا وفد، جس کی قیادت پارلیمنٹ اسپیکر اور چیف مذاکرات کار محمد باقر قالیباف کر رہے ہیں، زیورخ میں موجود ہے ایرانی وفد کو ’میناب 168‘ کا نام دیا گیا ہے۔