کراچی میں امن و امان کی صورتحال بہتر بنانے کے لیے رینجرز نے جوگی موڑ، ملیر کے علاقے میں خفیہ اطلاعات کی بنیاد پر کامیاب کارروائی کرتے ہوئے اسٹریٹ کرائم اور ڈکیتی کی درجنوں وارداتوں میں ملوث 4 ملزمان کو گرفتار کرلیا۔
رینجرز کے مطابق گرفتار ملزمان ایک منظم اور متحرک گینگ کا حصہ ہیں جو طویل عرصے سے ملیر، نیشنل ہائی وے اور ملحقہ علاقوں میں شہریوں کو اسلحے کے زور پر لوٹنے کی وارداتوں میں سرگرم تھے۔ کارروائی کے دوران ملزمان کے قبضے سے اسلحہ، چھینے گئے 49 قیمتی موبائل فونز اور نقدی برآمد کی گئی۔ترجمان رینجرز کا کہنا ہے کہ ابتدائی تفتیش میں انکشاف ہوا ہے کہ یہ گینگ موبائل فون اسنیچنگ کے علاوہ 70 سے 80 موٹرسائیکلیں چھیننے کی وارداتوں میں بھی ملوث رہا ہے۔ ملزمان واردات کے دوران مزاحمت کی صورت میں فائرنگ سے بھی گریز نہیں کرتے تھے، جس کے باعث متعدد شہری زخمی بھی ہوئے۔
ترجمان کے مطابق گرفتار ملزمان نے 13 جنوری کو نیشنل ہائی وے پر ایک شہری کو اسلحے کے زور پر روک کر 3 لاکھ روپے نقدی چھینی اور فرار ہوتے وقت شہری کی گاڑی پر فائرنگ بھی کی تھی، جس سے علاقے میں شدید خوف و ہراس پھیل گیا تھا۔رینجرز حکام کا کہنا ہے کہ ملزمان سے مزید تفتیش جاری ہے جبکہ برآمد شدہ موبائل فونز اور دیگر سامان کی شناخت کے بعد متاثرہ شہریوں کو واپس کرنے کا عمل بھی شروع کیا جائے گا۔ ملزمان کو قانونی کارروائی کے لیے متعلقہ پولیس کے حوالے کردیا گیا ہے۔رینجرز نے شہریوں سے اپیل کی ہے کہ وہ مشکوک سرگرمیوں کی فوری اطلاع قریبی قانون نافذ کرنے والے اداروں کو دیں تاکہ شہر میں جرائم کے خاتمے اور امن کے قیام کو یقینی بنایا جا سکے۔