بالی ووڈ اداکار رنویئر سنگھ اور فلم “ڈان 3” کے حوالے سے جاری تنازع نے بھارتی فلم انڈسٹری میں نئی بحث چھیڑ دی ہے۔
رپورٹس کے مطابق رنویئر سنگھ کے فلم سے الگ ہونے کے بعد معاملہ مزید سنگین ہو گیا جبکہ فلم انڈسٹری سے وابستہ تنظیموں نے بھی اس معاملے پر سخت مؤقف اختیار کیا ہے۔
اطلاعات کے مطابق فلم کے پروڈیوسرز کو شوٹنگ کی تیاریوں، بیرون ملک لوکیشنز، بکنگ اور دیگر انتظامات کی وجہ سے بھاری مالی نقصان کا سامنا کرنا پڑا۔
ذرائع کا کہنا ہے کہ فلم کی شوٹنگ شروع ہونے سے کچھ عرصہ قبل رنویئر سنگھ نے فلم سے علیحدگی اختیار کی جس کے بعد پروڈکشن ٹیم مشکلات کا شکار ہو گئی۔
بھارتی میڈیا رپورٹس کے مطابق اداکار اور فلم ساز فرحان اختر کے درمیان تخلیقی اختلافات بھی سامنے آئے ہیں۔
کچھ رپورٹس میں دعویٰ کیا گیا کہ اسکرپٹ میں تبدیلیوں اور فلم کی کاسٹنگ سے متعلق معاملات پر بھی اختلافات موجود تھے۔
فلم ورکرز سے وابستہ تنظیم نے مؤقف اختیار کیا کہ اداکاروں اور پروڈکشن ہاؤسز کے درمیان طے پانے والے معاہدوں کا احترام ضروری ہے کیونکہ بڑے منصوبوں میں تاخیر سے پوری انڈسٹری متاثر ہوتی ہے۔
دوسری جانب رنویئر سنگھ کی ٹیم کا کہنا ہے کہ اداکار ہمیشہ پروفیشنل رویہ رکھتے ہیں اور وہ اس معاملے پر غیر ضروری بیان بازی سے گریز کر رہے ہیں۔
بالی ووڈ مبصرین کے مطابق “ڈان” فرنچائز بھارتی سینما کی بڑی فلمی سیریز میں شمار ہوتی ہے، اس لیے اس منصوبے میں کسی بھی قسم کی تبدیلی فوری طور پر خبروں کی زینت بن جاتی ہے۔
ماہرین کا کہنا ہے کہ بڑے بجٹ کی فلموں میں اب معاہدوں، شیڈولنگ اور پروفیشنل ذمہ داریوں پر پہلے سے زیادہ سختی کی جا رہی ہے تاکہ مالی نقصانات سے بچا جا سکے۔
سوشل میڈیا پر بھی مداحوں کی جانب سے مختلف ردعمل سامنے آ رہے ہیں، جہاں کچھ افراد رنویئر سنگھ کی حمایت کر رہے ہیں جبکہ بعض صارفین فلم کے مستقبل پر سوالات اٹھا رہے ہیں۔
رنویئر سنگھ اور ڈان 3 تنازع شدت اختیار کر گیا
