اداکارہ مومنہ اقبال اور رکن پنجاب اسمبلی ثاقب چدھڑ کے درمیان جاری تنازع کی این سی سی آئی اے کی جانب سے عدالت میں پیش کی گئی تفتیشی رپورٹ میں ثاقب چدھڑ کو تفتیش کے دوران قصور وار قرار دیا گیا ہے۔
اداکارہ مومنہ اقبال کو مبینہ طور پر ہراساں کرنے اور دھمکیاں دینے سے متعلق مقدمے میں مسلم لیگ (ن) کے رکن پنجاب اسمبلی ثاقب چدھڑ اور ان کی اہلیہ سمیرا کی عبوری ضمانت میں توسیع کر دی گئی،سیشن کورٹ لاہور میں کیس کی سماعت ایڈیشنل سیشن جج کے روبرو ہوئی، جہاں تفتیشی افسر نے عدالت کو بتایا کہ ثاقب چدھڑ سے متعلق تحقیقات مکمل کر لی گئی ہیں، جبکہ تفتیشی رپورٹ عدالت میں پیش کر دی گئی۔
عدالت کو آگاہ کیا گیا کہ شریک ملزمہ سمیرا نے حال ہی میں اپنا موبائل فون تحقیقاتی حکام کے حوالے کیا ہے، جسے فرانزک تجزیے کے لیے بھیج دیا گیا ہے تاکہ مقدمے سے متعلق شواہد کا جائزہ لیا جا سکے، فریقین کے وکلاء سے آئندہ سماعت پر حتمی دلائل طلب کر لیے،تفتیشی افسر نے عدالت کو بتایا کہ ثاقب چدھڑ کے خلاف تحقیقات مکمل کر لی گئی ہیں اور تفتیش کے نتیجے میں وہ قصور وار پائے گئے ہیں۔
دوسری جانب مومنہ اقبال کے وکیل عدنان نے عدالت سے ملزمان کی ضمانت خارج کرنے کی استدعا کرتے ہوئے مؤقف اختیار کیا کہ ملزمان کی آزادی ان کے مؤکلہ کے لیے خطرے کا باعث بن سکتی ہے، لہٰذا عبوری ضمانت ختم کی جائے،عدالت نے فریقین کے مؤقف سننے کے بعد کیس کی مزید سماعت 3 ستمبر تک ملتوی کرتے ہوئے حتمی دلائل طلب کر لیے۔