نیویارک: پاکستان کی معروف قوالی جوڑی صابری سسٹرز کو نیویارک کے مشہور ٹائمز اسکوائر میں اسپاٹی فائے کے ڈیجیٹل بل بورڈ پر نمایاں کیا گیا ہے، جو پاکستانی موسیقی اور خواتین فنکاروں کے لیے ایک بڑا عالمی اعزاز قرار دیا جا رہا ہے۔
یہ اعزاز اسپاٹی فائے کے ایکول پروگرام کے تحت دیا گیا، جس کا مقصد دنیا بھر کی باصلاحیت خواتین فنکاروں کو عالمی سطح پر متعارف کرانا اور ان کی فنی خدمات کو اجاگر کرنا ہے۔ صابری سسٹرز کی تصویر 17 جون کو ٹائمز اسکوائر کے ڈیجیٹل بل بورڈ پر آویزاں کی گئی۔
انعمتہ صابری اور سمن صابری پر مشتمل یہ جوڑی پاکستان کے معروف صابری گھرانے سے تعلق رکھتی ہے، جسے برصغیر میں قوالی کی روایت کا ایک اہم ستون سمجھا جاتا ہے۔ دونوں فنکار مرحوم امجد صابری کی بھتیجیاں ہیں اور ان کے خاندان نے کئی دہائیوں سے قوالی کے فروغ میں نمایاں کردار ادا کیا ہے۔
صابری سسٹرز کو 2017 میں اپنے مرحوم چچا امجد صابری کو خراج عقیدت پیش کرنے والے کلام کے ذریعے خاص شہرت حاصل ہوئی۔ اس کے بعد انہوں نے عاطف اسلم، عاصم اظہر اور فرحان سعید سمیت متعدد معروف گلوکاروں کے ساتھ بھی کامیاب پراجیکٹس کیے۔
اس اعزاز پر اظہارِ خیال کرتے ہوئے صابری سسٹرز نے کہا کہ اسپاٹی فائے کے ایکول پروگرام میں پاکستان کی نمائندگی کرنا ان کے لیے باعث فخر ہے۔ انہوں نے کہا کہ عابدہ پروین اور صنم ماروی جیسی عظیم فنکاراؤں کے نقش قدم پر چلنا ان کے لیے ایک اعزاز کی بات ہے۔
دونوں بہنیں اس وقت اپنے پہلے برطانیہ کے موسیقی دورے کی تیاریوں میں مصروف ہیں، جہاں وہ روایتی قوالی اور جدید موسیقی کا منفرد امتزاج پیش کریں گی۔
صابری سسٹرز کو نیویارک کے ٹائمز اسکوائر میں عالمی اعزاز مل گیا
