بھارت کی ریاست تلنگانہ کے ضلع کریمنگر کے گاؤں جوبلی نگر میں انسانیت سوز واقعہ سامنے آیا ہے جہاں ایک باپ نے مبینہ طور پر اپنے ہی چار سالہ جڑواں بیٹیوں کو صرف اس لیے قتل کر دیا کہ وہ بیٹے کا خواہاں تھا۔
پولیس کے مطابق 28 سالہ سری سیلم نے اپنے والد اشوک، والدہ لاوانیا اور چھوٹے بھائی راکیش کے ساتھ مل کر اس دل دہلا دینے والے جرم کی منصوبہ بندی کی۔ اے نرنجن ریڈی، جو کہ رورل سرکل انسپکٹر ہیں، نے بتایا کہ ملزم شروع سے ہی بیٹیوں کو بوجھ سمجھتا تھا اور بیٹے کی خواہش رکھتا تھا۔انہوں نے کہا کہ جب ملزم کی بیوی مونیکا حاملہ تھی اور معلوم ہوا کہ جڑواں بیٹیاں پیدا ہوں گی تو اس نے اسقاط حمل کے لیے دباؤ ڈالا، تاہم بیوی نے انکار کر دیا۔ 2022 میں بیٹیوں کی پیدائش کے بعد بھی ملزم نے نہ صرف انہیں قبول کرنے سے انکار کیا بلکہ ہسپتال میں ان کے قریب تک نہیں گیا۔پولیس کا کہنا ہے کہ ملزم کو خدشہ تھا کہ اس کی تقریباً دو کروڑ روپے مالیت کی جائیداد بیٹیوں کی شادی پر خرچ ہو جائے گی، جس کی وجہ سے اس نے اہل خانہ کے ساتھ مل کر بچوں کو قتل کرنے کا فیصلہ کیا۔
تحقیقات کے مطابق 3 اپریل کو ملزم نے اپنی بیوی کو گھر پر چھوڑا اور بیٹیوں کو کھیتوں میں لے گیا۔ اس نے ایسا وقت چنا جب وہاں کوئی موجود نہ ہو۔ کھیت میں موجود کنویں کے پاس کھیلتی ہوئی بچیوں میں سے ایک، گیتھن وِکا، کو اس نے دھکا دے کر کنویں میں گرا دیا جس سے وہ موقع پر ہی جاں بحق ہو گئی۔دوسری بچی، گیتھمشی، پانی میں زندگی بچانے کی کوشش کرتی رہی، تاہم ملزم خود کنویں میں اترا اور اسے ہاتھوں سے ڈبو کر قتل کر دیا۔ پولیس کے مطابق یہ انتہائی سفاک اور سوچا سمجھا اقدام تھا۔
قتل کے بعد ملزم نے واقعے کو حادثہ ظاہر کرنے کے لیے شور مچایا اور جھوٹی مدد کی کوشش کا ڈرامہ کیا۔ جب ماں موقع پر پہنچی تو ایک بچی کی لاش کنویں کے قریب تھی جبکہ دوسری لاپتہ تھی۔ گاؤں والوں نے رسیوں کی مدد سے لاشیں نکالیں۔ابتدائی تفتیش میں ملزم کے بیانات میں تضاد پایا گیا جس پر گاؤں والوں کو شک ہوا اور انہوں نے مبینہ طور پر اسے تشدد کا نشانہ بنایا۔ بعد ازاں ملزم موقع سے فرار ہو گیا اور اپنے اہل خانہ کو اطلاع دی کہ "منصوبہ کامیاب ہو گیا”۔پولیس نے چاروں ملزمان کو گاؤں گوپال پور سے گرفتار کر لیا ہے۔ بعد میں ماہر تیراکوں کی مدد سے دوسری بچی کی لاش کنویں سے نکالی گئی۔