ساہیوال: کاونٹر ٹیرارزم ڈیپارٹمنٹ (سی ٹی ڈی) نے انٹیلی جنس بنیادوں پر کیے گئے ایک آپریشن کے دوران بھارتی خفیہ ایجنسی "را” کے لیے مبینہ طور پر جاسوسی کرنے والے ایک مشتبہ شخص کو گرفتار کر لیا ہے
سی ٹی ڈی ذرائع کے مطابق گرفتار ملزم کی شناخت روز علی خان کے نام سے ہوئی ہے، جو مبینہ طور پر ارمڑ پایانہ، پشاور کا رہائشی ہے۔ حکام کا کہنا ہے کہ کارروائی خفیہ اطلاع کی بنیاد پر کی گئی، جس کے دوران ملزم کو ساہیوال سے حراست میں لیا گیا۔ذرائع کے مطابق ملزم کے قبضے سے بارودی مواد، ایک پرائما کارڈ، ڈیٹونیٹر، برقی تار، تین بیٹریاں اور دو موبائل فون برآمد کیے گئے ہیں۔ برآمد شدہ سامان کو قبضے میں لے کر فرانزک تجزیے کے لیے بھیج دیا گیا ہے تاکہ مزید شواہد اکٹھے کیے جا سکیں۔سی ٹی ڈی کا کہنا ہے کہ ابتدائی تحقیقات کے مطابق ملزم اوکاڑہ کے فیصل آباد روڈ پر واقع کوہ نور سٹی میں حساس تنصیبات کو مبینہ طور پر نشانہ بنانے کی غرض سے موجود تھا۔ بروقت کارروائی کے نتیجے میں ایک ممکنہ تخریب کاری کی کوشش کو ناکام بنایا گیا۔
حکام کے مطابق ملزم سے مزید تفتیش جاری ہے تاکہ اس کے مبینہ نیٹ ورک، سہولت کاروں اور ممکنہ رابطوں سے متعلق معلومات حاصل کی جا سکیں۔ سی ٹی ڈی نے واقعے کے حوالے سے قانونی کارروائی کا آغاز کر دیا ہے اور متعلقہ دفعات کے تحت مقدمہ درج کیے جانے کا بھی امکان ہے۔