بالی ووڈ کے معروف اداکار سلمان خان کو راجستھان ہائیکورٹ سے ایک اہم قانونی ریلیف حاصل ہوا ہے، جہاں عدالت نے گمراہ کن اشتہار سے متعلق کیس میں ان کے خلاف جاری قابلِ ضمانت وارنٹ معطل کر دیے ہیں۔
بھارتی میڈیا رپورٹس کے مطابق یہ کیس ‘راج شری پان مصالحہ’ کے اشتہار سے متعلق تھا، جس میں سلمان خان سمیت دیگر شخصیات کو بھی شامل کیا گیا تھا۔ عدالت نے نہ صرف وارنٹ معطل کیے بلکہ متعلقہ پروڈکٹ کے اشتہار پر عائد پابندی کو بھی وقتی طور پر روک دیا ہے۔
یہ فیصلہ جسٹس انوپ سنگھ پر مشتمل سنگل بینچ نے سلمان خان اور کمپنی کی جانب سے دائر درخواست پر سماعت کے بعد سنایا۔ درخواست میں ڈسٹرکٹ کنزیومر کمیشن اور اسٹیٹ کمیشن کے ان احکامات کو چیلنج کیا گیا تھا جن کے تحت اشتہار پر پابندی اور اداکار کے خلاف کارروائی کی گئی تھی۔
سماعت کے دوران سلمان خان کے وکلاء نے مؤقف اختیار کیا کہ شکایت گزار یوگیندر سنگھ خود کو سماجی کارکن ظاہر کرتے ہیں لیکن وہ اس پروڈکٹ کے صارف نہیں ہیں، اس لیے ان کی درخواست قانونی بنیادوں پر کمزور ہے۔ مزید یہ کہ اشتہار میں دکھایا گیا آئٹم پان مصالحہ یا گٹکا نہیں بلکہ چاندی کے ورق سے مزین الائچی ہے، جس پر پابندی لگانا غیر قانونی قرار دیا گیا۔
وکلاء نے یہ بھی مؤقف اپنایا کہ اس نوعیت کے معاملات مرکزی کنزیومر پروٹیکشن اتھارٹی کے دائرہ اختیار میں آتے ہیں، نہ کہ مقامی کمیشن کے۔ عدالت نے تمام دلائل سننے کے بعد نچلی عدالتوں کے تینوں احکامات کو معطل کر دیا۔
واضح رہے کہ شکایت گزار نے عدالت سے درخواست کی تھی کہ راج شری پان مصالحہ کی فروخت پر پابندی عائد کی جائے اور سلمان خان کو اس کی تشہیر سے روکا جائے، تاہم فی الحال ہائیکورٹ کے فیصلے سے اداکار کو بڑا ریلیف مل گیا ہے۔
سلمان خان کو راجستھان ہائیکورٹ سے بڑا ریلیف مل گیا
