اسلام آباد میں اعلیٰ سطح کی سفارتی سرگرمیاں جاری ہیں جہاں سعودی عرب کے وزیر خارجہ نے وزیر اعظم ہاؤس کا دورہ کیا اور اہم ملاقاتیں کیں۔ اس موقع پر پاکستان اور سعودی عرب کے درمیان تعلقات کو مزید مضبوط بنانے پر تبادلہ خیال کیا گیا۔
وزیر اعظم ہاؤس آمد پر سعودی وزیر خارجہ کا استقبال وزیر اعظم کے معاون خصوصی برائے امور خارجہ سید طارق فاطمی نے کیا، جبکہ بعد ازاں وزیر اعظم شہباز شریف نے اپنے دفتر میں معزز مہمان کا پرتپاک استقبال کیا۔
ملاقات کے دوران دونوں ممالک کے درمیان دوطرفہ تعلقات، علاقائی صورتحال اور باہمی تعاون کے فروغ پر گفتگو کی گئی۔ اس اہم ملاقات میں نائب وزیر اعظم و وزیر خارجہ اسحاق ڈار، مشیر برائے قومی سلامتی اور ڈی جی آئی ایس آئی لیفٹننٹ جنرل محمد عاصم ملک بھی شریک تھے۔
ذرائع کے مطابق حالیہ علاقائی کشیدگی کے تناظر میں اس ملاقات کو خاص اہمیت حاصل ہے، جہاں مشرق وسطیٰ کی صورتحال اور ممکنہ سفارتی اقدامات پر بھی غور کیا گیا۔
پاکستان اور سعودی عرب کے درمیان تاریخی اور قریبی تعلقات موجود ہیں، اور اس طرح کے اعلیٰ سطحی رابطے دونوں ممالک کے درمیان تعاون کو مزید فروغ دینے میں اہم کردار ادا کرتے ہیں۔
سعودی وزیر خارجہ کی وزیر اعظم ہاؤس آمد، اہم معاملات زیر غور
