سیکیورٹی فورسز کا دالبندین کے علاقے لگاپ میں کامیاب انٹیلی جنس بیسڈ آپریشن۔ بی ایل اے کا اہم کمانڈر علی احمد عرف نادر ساتھی سمیت جہنم واصل، جدید اسلحہ اور گولہ بارود برآمدکر لیا گیا
ایف سی بلوچستان (ساؤتھ) نے دالبندین کے علاقے لگاپ میں بلوچ عوام کی لوٹ مار کرنے، بھتہ خوری، قومی املاک پر حملوں، اغواء برائے تاوان، خواتین کے تقدس کی پامالی اور نہتے بلوچوں کی خونریزی میں ملوث فتنہ الہندوستان کے دہشت گردوں کی موجودگی سے متعلق اطلاعات کی بنیاد پر ایک کامیاب انٹیلی جنس بیسڈ آپریشن کیا۔دہشت گردوں کی موجودگی کی اطلاعات پر علاقے کا محاصرہ کرکے ناکہ بندی کی گئی۔ اس دوران ایک مشکوک موٹر سائیکل پر سوار افراد کو رکنے کا اشارہ کیا گیا تو ان کی جانب سے فائرنگ شروع کر دی گئی۔ جوابی کارروائی میں کالعدم تنظیم بی ایل اے کا اہم کمانڈر علی احمد عرف نادر اپنے ایک ساتھی سمیت جہنم واصل ہوگیا۔
کارروائی کے دوران دہشت گردوں کے قبضے سے جدید اسلحہ اور گولہ بارود برآمد کیا گیا،برآمد سامان میں 1 عدد سب مشین گن،4 عدد سب مشین گن میگزین،1 عدد پستول،2 عدد پستول میگزین، سب مشین گن اور پستول کا ایمونیشن، 2 عدد بینڈولیرز، 1 عدد بی ایل اے کا جھنڈا،1 عدد موبائل فون اور دہشت گردانہ کارروائیوں میں استعمال ہونے والی موٹر سائیکل شامل ہیں، برآمد شدہ اسلحہ نہتے بلوچ عوام کی ٹارگٹ کلنگ اور دیگر دہشت گردانہ سرگرمیوں میں استعمال کیا جا رہا تھا۔حکام کے مطابق دہشت گردوں کے خاتمے کے لیے آپریشنز بدستور جاری ہیں، جو آخری دہشت گرد کے خاتمے تک جاری رہیں گے