مسیحی برادری کے نمائندہ وفد کی وفاقی وزیر قانون، انصاف و انسانی حقوق اعظم نذیر تارڑ اور وفاقی وزیر اطلاعات و نشریات عطاء اللہ تارڑ سے ملاقات ہوئی ہے
ملاقات میں اقلیتوں کے حقوق، قانونی اصلاحات اور مسیحی برادری کی فلاح و بہبود سے متعلق امور پر تفصیلی تبادلۂ خیال کیا گیا،مسیحی برادری کے وفد نے اقلیتی برادریوں کے حقوق کے تحفظ کے لئے حکومت کے مسلسل عزم کو سراہا ،وفد نے حالیہ قانون سازی بالخصوص چائلڈ میرج ریسٹرینٹ ایکٹ کا خیرمقدم کیا،وفد نے اقلیتوں کے تحفظ اور مساوی مواقع کے فروغ کے حوالے سے حکومت کی کاوشوں کو بھی قابلِ تحسین قرار دیا
ملاقات میں اقلیتی برادری کو درپیش مسائل کے حل پر تفصیلی گفتگو ہوئی، متعلقہ قوانین و پالیسیوں کے ذریعے مسیحی برادری کی ضروریات کا موثر انداز میں احاطہ کرنے جیسے امور پرغور کیا گیا،ملاقات میں سفارشات کا جائزہ ، مسیحی پرسنل لاز سمیت دیگر امور کے حل کیلئے مؤثر طریقہ کار وضع کرنے پر اتفاق طے پا گیا،وفاقی وزیر قانون اعظم نذیر تارڑ کا کہنا تھا کہ جامع قانونی اور پالیسی اصلاحات کے فروغ کیلئے مشاورتی عمل نہایت اہمیت کا حامل ہے، حکومت تمام شہریوں کو مساوی حقوق اور یکساں مواقع کی فراہمی کیلئے پُرعزم ہے
وزیر اطلاعات عطاء اللہ تارڑ نے اقلیتوں کے حقوق کے تحفظ کے لیے حکومت کے عزم کا اعادہ کیا اور کہا کہ اقلیتی برادریوں کے نمائندوں سے مشاورت قانون و پالیسی سازی میں تمام شہریوں کی ضروریات کاخیال یقینی بناتی ہے،حکومت بین المذاہب ہم آہنگی، مساوی شہریت اورجامع معاشرے کے فروغ کیلئے پُرعزم ہے، ایسا معاشرہ جہاں ہر پاکستانی بلاامتیاز قومی ترقی میں اپنا کردار ادا کر سکے،