کراچی کے نادرن بائی پاس پر ایک سیکیورٹی گارڈ نے بھارتی نیولا مار ڈالا، جس کے بعد محکمہ جنگلی حیات نے واقعے پر وضاحت جاری کرتے ہوئے شہریوں کو ایسے جنگلی جانوروں کو نقصان نہ پہنچانے کی ہدایت کی ہے۔
محکمہ جنگلی حیات کے مطابق نیولے کو ممکنہ طور پر اس خدشے کے پیش نظر ہلاک کیا گیا کہ وہ علاقے میں موجود پالتو جانوروں کو نقصان پہنچا سکتا ہے۔ تاہم حکام کا کہنا ہے کہ نیولا عام طور پر انسانوں کے لیے خطرناک جانور نہیں اور اسے بلاوجہ مارنے سے گریز کرنا چاہیے۔
محکمہ جنگلی حیات کے مطابق نیولا پاکستان، بھارت، نیپال اور جنوبی ایشیا کے دیگر علاقوں میں پایا جاتا ہے۔ یہ جانور اکثر انسانی آبادیوں کے قریب بھی نظر آتا ہے اور شہری علاقوں میں اس کی موجودگی غیر معمولی نہیں۔
حکام کا کہنا ہے کہ نیولا ماحولیاتی نظام کے لیے بھی اہم کردار ادا کرتا ہے۔ یہ مختلف چھوٹے جانوروں اور کیڑوں کو کھاتا ہے، جس کے باعث قدرتی ماحول میں حیاتیاتی توازن برقرار رکھنے میں مدد ملتی ہے۔
محکمہ جنگلی حیات نے واضح کیا کہ نیولا ماحول دوست اور نسبتاً بے ضرر جانور ہے، اس لیے صرف خوف یا غلط فہمی کی بنیاد پر اسے ہلاک نہیں کرنا چاہیے۔ اگر کسی شہری علاقے میں ایسا جانور نظر آئے تو اسے خود پکڑنے یا مارنے کے بجائے متعلقہ جنگلی حیات کے حکام سے رابطہ کیا جانا چاہیے۔
حکام کے مطابق جنگلی جانوروں کے بارے میں آگاہی بڑھانے اور شہریوں کو ان کے ماحولیاتی کردار سے متعلق معلومات فراہم کرنے کی ضرورت ہے تاکہ ایسے واقعات کی روک تھام ہوسکے۔
کراچی میں سیکیورٹی گارڈ کے ہاتھوں نیولا ہلاک
