کراچی سمیت سندھ کے مختلف اضلاع میں شدید گرمی کی لہر برقرار ہے، جس کے باعث شہریوں کو سخت موسمی حالات کا سامنا ہے۔ محکمہ موسمیات کے مطابق کراچی میں درجہ حرارت 42 ڈگری سینٹی گریڈ تک پہنچ گیا ہے جبکہ حبس کے باعث گرمی کی شدت 44 ڈگری جیسی محسوس کی جا رہی ہے۔
دیگر شہروں کی صورتحال بھی تشویشناک ہے، جہاں حیدرآباد میں محسوس کیا جانے والا درجہ حرارت 47 ڈگری تک جا پہنچا ہے جبکہ سکھر میں بھی گرمی کی شدت 45 ڈگری تک ریکارڈ کی گئی۔ ماہرین کے مطابق درجہ حرارت کے ساتھ نمی کے اضافے کی وجہ سے ہیٹ انڈیکس مزید بڑھ رہا ہے، جس سے گرمی کا اثر زیادہ محسوس ہو رہا ہے۔
شدید گرمی کے پیش نظر کراچی کے مختلف علاقوں میں ہیٹ ویو کیمپس قائم کر دیے گئے ہیں جہاں شہریوں کو ٹھنڈا پانی، ابتدائی طبی امداد اور آرام کی سہولیات فراہم کی جا رہی ہیں۔ یہ اقدامات خاص طور پر بزرگوں، بچوں اور محنت کش طبقے کو ریلیف دینے کے لیے کیے گئے ہیں۔
ماہرین صحت نے شہریوں کو ہدایت کی ہے کہ وہ غیر ضروری طور پر گھروں سے باہر نہ نکلیں، خاص طور پر دوپہر کے اوقات میں احتیاط کریں، زیادہ پانی استعمال کریں اور ہلکے کپڑے پہنیں تاکہ ہیٹ اسٹروک جیسے خطرات سے بچا جا سکے۔
دوسری جانب ملک کے دیگر بڑے شہروں میں موسم نسبتاً معتدل ہے۔ لاہور میں درجہ حرارت 34، اسلام آباد میں 33 جبکہ پشاور میں 29 ڈگری سینٹی گریڈ ریکارڈ کیا گیا ہے، جس سے ان شہروں میں شہریوں کو گرمی کی شدت کم محسوس ہو رہی ہے۔
کراچی سمیت سندھ میں شدید گرمی، ہیٹ ویو کیمپ قائم
