شادی کے اگلے ہی دن دلہن زیورات اور نقدی لے کر فرار، مقدمہ درج

بھارتی بہار کے ضلع کیمور میں شادی کے نام پر مبینہ دھوکہ دہی کا ایک معاملہ سامنے آیا ہے، جہاں راجستھان سے آنے والے دولہے نے الزام لگایا ہے کہ شادی کے اگلے ہی دن دلہن زیورات اور نقد رقم لے کر فرار ہو گئی۔

متاثرہ دولہا گوتم کمار، راجستھان کے ضلع بیکانیر کے دیشنوک گاؤں کا رہائشی ہے۔ اس نے بھبھوا تھانے میں دلہن، اور ایک اور شخص کے خلاف ایف آئی آر درج کرائی ہے۔ پولیس کے مطابق واقعے کی تحقیقات جاری ہیں۔شکایت کے مطابق گوتم کمار کے خاندان کی ملاقات سنتوش عرف ستیش تیواری نامی ایک شخص سے ہوئی، جس نے کیمور کے کرمچٹ تھانہ علاقے کی رہائشی 24 سالہ نیہا کماری سے شادی کرانے کا وعدہ کیا۔ الزام ہے کہ شادی کے انتظامات کے نام پر خاندان سے ایک لاکھ روپے نقد وصول کیے گئے، جبکہ تقریباً ایک لاکھ 17 ہزار روپے مالیت کے زیورات اور دیگر سامان بھی لیا گیا۔ خاندان کا کہنا ہے کہ شادی پر مجموعی طور پر تقریباً چار لاکھ روپے خرچ ہوئے۔شکایت کے مطابق 7 جولائی کو بھبھوا کورٹ کے قریب شادی کی رسم مکمل کرائی گئی۔ بعد ازاں ملوانے والےنے خاندان کو ہوٹل جانے کا مشورہ دیتے ہوئے کہا کہ دلہن کو اگلی صبح ریلوے اسٹیشن پہنچا دیا جائے گا۔الزام ہے کہ اگلی صبح بھبھوا روڈ ریلوے اسٹیشن پر دلہن نے باتھ روم جانے کا بہانہ کیا اور باہر پہلے سے موجود موٹر سائیکل پر سوار ہو کر فرار ہو گئی۔ متاثرہ خاندان نے فوری طور پر دلہن سے ملوانے والے سے رابطہ کرنے کی کوشش کی، تاہم کچھ ہی دیر بعد اس کا موبائل فون بھی بند ہو گیا۔

بھبھوا تھانے کے ایس ایچ او مکیش کمار کے مطابق پولیس نے شکایت موصول ہونے کے بعد مقدمہ درج کر لیا ہے اور تمام پہلوؤں سے تحقیقات کی جا رہی ہیں۔ پولیس کا کہنا ہے کہ شواہد کی بنیاد پر قانونی کارروائی عمل میں لائی جائے گی۔