شاہد آفریدی کا نرمل پرجا اور براڈ پیک حادثے کے جاں بحق کوہ پیماؤں کو خراج عقیدت

پاکستان کے میں واقع دنیا کی بارہویں بلند ترین چوٹی براڈ پیک پر گرنے والے برفانی تودے کے نتیجے میں عالمی شہرت یافتہ برطانوی نژاد نیپالی کوہ پیما نرمل پرجا (نمزدائی) سمیت 10 کوہ پیماؤں کی ہلاکت کی تصدیق کردی گئی۔

نرمل پرجا کی کمپنی ’’ایلیٹ ایکسپیڈیشنز‘‘ نے بیان میں کہا کہ انتہائی دکھ اور بھاری دل کے ساتھ اس بات کی تصدیق کی جاتی ہے کہ 43 سالہ نرمل پرجا جمعرات کو براڈ پیک پر گرنے والے برفانی تودے میں جان کی بازی ہار گئے۔

بعد ازاں ان کے بڑے بھائی کمل پرجا نے بھی اس افسوسناک خبر کی تصدیق کرتے ہوئے کہا کہ نرمل کی یاد ہمیشہ ان کے ساتھ رہے گی اور ان کی خدمات کو کبھی فراموش نہیں کیا جاسکے گا۔

پاکستان کے قراقرم سلسلے میں واقع 8 ہزار 47 میٹر بلند براڈ پیک پر حادثے کے وقت نرمل پرجا ایک بین الاقوامی مہم کی قیادت کر رہے تھے، پاکستانی حکام کے مطابق ہلاک ہونے والوں میں امریکا کی میلوری گیس، عمان کی نذیرہ احمد عبداللہ الحارثی اور نیپال کے پور بہادر گرونگ بھی شامل ہیں، جبکہ دیگر لاپتا کوہ پیماؤں کی تلاش کے لیے ریسکیو ٹیمیں مسلسل کارروائیاں کر رہی ہیں۔

نیپال کے وزیراعظم نے بھی نرمل پرجا سمیت چھ نیپالی اور چار غیر ملکی کوہ پیماؤں کی ہلاکت پر گہرے رنج و غم کا اظہار کرتے ہوئے کہا کہ ان تمام کوہ پیماؤں کی بہادری، عزم اور خدمات ہمیشہ یاد رکھی جائیں گی۔

برطانیہ کے شہزادہ ولیم نے نرمل پرجا کی وفات پر افسوس کا اظہار کرتے ہوئے کہا کہ انہوں نے برطانوی فوج میں نمایاں خدمات انجام دیں اور بعد ازاں دنیا کے عظیم ترین کوہ پیماؤں میں اپنا نام بنایا،جو کام ناممکن دکھائی دیتے تھے، انہیں ممکن بنانے کی ان کی انتھک جدوجہد، عاجزی اور بے لوث خدمت نے انہیں ایک منفرد شخصیت بنا دیا۔ میری ہمدردیاں اور دعائیں ان کے اہلِ خانہ اور اس حادثے میں جان گنوانے والے تمام افراد کے سوگوار خاندانوں کے ساتھ ہیں۔

برطانوی وزیر دفاع نے بھی انہیں ایک غیر معمولی شخصیت قرار دیتے ہوئے کہا کہ ان کی کامیابیاں ہمیشہ دنیا کو متاثر کرتی رہیں گی۔

قومی کرکٹ ٹیم کے سابق کپتان شاہد آفریدی نے نرمل پرجا (نمز دائی) اور دیگر جاں بحق کوہ پیماؤں کو زبردست خراجِ عقیدت پیش کرتے ہوئے ان کے اہلِ خانہ سے دلی تعزیت کا اظہار کیا ہے۔

شاہد آفریدی نے سماجی رابطے کی ویب سائٹ ایکس،پر اپنے پیغام میں کہا کہ کچھ ہیرو کھیل کے میدانوں یا اسٹیڈیمز میں نہیں کھیلتے بلکہ دنیا کی بلند ترین چوٹیوں کو سر کر کے اپنی جرات اور عزم کی نئی مثالیں قائم کرتے ہیں، نرمل پرجا نے اپنی غیر معمولی ہمت، نظم و ضبط اور غیر متزلزل عزم سے ثابت کیا کہ اگر انسان کے ارادے مضبوط ہوں تو ناممکن کو بھی ممکن بنایا جا سکتا ہے،ان کی کامیابیاں صرف کوہ پیمائی تک محدود نہیں رہیں بلکہ انہوں نے پوری دنیا میں لاکھوں افراد کو اپنے خوابوں کے حصول کے لیے حوصلہ اور امید فراہم کی۔

سابق کپتان نے اپنے پیغام میں براڈ پیک پر پیش آنے والے افسوسناک حادثے پر گہرے دکھ کا اظہار کرتے ہوئے کہا کہ نرمل پرجا اور ان کے ساتھ جاں بحق ہونے والے تمام کوہ پیماؤں کی المناک موت انتہائی افسوسناک ہے یہ حادثہ نہ صرف کوہ پیمائی کی دنیا بلکہ کھیل اور مہم جوئی سے وابستہ ہر فرد کے لیے ایک بڑا نقصان ہے۔

شاہد آفریدی نے مزید کہا کہ نرمل پرجا اور ان کے ساتھیوں کی جرات، بہادری اور قربانی ہمیشہ یاد رکھی جائے گی اور آنے والی نسلیں ان کے عزم اور حوصلے سے رہنمائی حاصل کرتی رہیں گی۔ ان کے مطابق ایسے افراد اپنی زندگی میں ہی نہیں بلکہ اپنے بعد بھی دوسروں کے لیے مشعلِ راہ بن جاتے ہیں۔

انہوں نے اپنے تعزیتی پیغام کے اختتام پر دعا کی کہ اللہ تعالیٰ حادثے میں جاں بحق ہونے والے تمام کوہ پیماؤں کو اپنی جوارِ رحمت میں اعلیٰ مقام عطا فرمائے اور ان کے اہلِ خانہ کو یہ ناقابلِ تلافی صدمہ برداشت کرنے کی ہمت اور صبر عطا کرے۔

پاکستان کی معروف کوہ پیما اور الپائن کلب آف پاکستان کی نمائندہ نائلہ کیانی نے بتایا کہ نرمل پرجا نہایت تجربہ کار، بے خوف اور بہترین قائد تھے ان کے مطابق ریسکیو ٹیموں نے کچھ لاشیں دیکھ لی ہیں، تاہم دشوار گزار علاقے اور خراب موسم کے باعث ان تک پہنچنے میں مشکلات کا سامنا ہے الپائن کلب کا کہنا ہے کہ تمام لاشیں ملنے کے بعد ہی حتمی اعلان کیا جائے گا۔

گنیز ورلڈ ریکارڈز نے نرمل پرجا کی ہلاکت پر گہرے دکھ کا اظہار کرتے ہوئے انہیں خراج عقیدت پیش کیا ہے۔