سیالکوٹ (باغی ٹی وی، ڈسٹرکٹ رپورٹر مدثر رتو) سیالکوٹ میں صفائی کے لیے مختص سالڈ ویسٹ مینجمنٹ کمپنی کا کچرا اٹھانے والا سرکاری لوڈر رکشہ مبینہ طور پر ذاتی آمد و رفت کے لیے استعمال کیے جانے کا انکشاف ہوا ہے، جو سرکاری وسائل کے ناجائز استعمال کے زمرے میں آتا ہے۔
شہریوں کے مطابق صفائی کے نظام کو بہتر بنانے کے لیے فراہم کی گئی سرکاری گاڑیوں کا ذاتی مقاصد کے لیے استعمال نہ صرف قواعد کی خلاف ورزی ہے بلکہ اس سے شہر کی صفائی کا نظام بھی بری طرح متاثر ہو رہا ہے۔ عوامی حلقوں کا کہنا ہے کہ اگر یہی گاڑیاں صفائی کے بجائے نجی استعمال میں رہیں گی تو گندگی میں اضافہ ہونا ناگزیر ہے۔
شہریوں نے متعلقہ حکام سے مطالبہ کیا ہے کہ اس معاملے کا فوری نوٹس لیا جائے اور سرکاری گاڑی کے مبینہ غلط استعمال میں ملوث ذمہ دار افراد کے خلاف کارروائی عمل میں لائی جائے۔ اس کے ساتھ ساتھ سالڈ ویسٹ مینجمنٹ کمپنی اور ضلعی انتظامیہ سے اپیل کی گئی ہے کہ سرکاری گاڑیوں کے استعمال کی کڑی نگرانی یقینی بنائی جائے تاکہ عوامی وسائل کا درست اور شفاف استعمال ممکن بنایا جا سکے۔