سینئر صوبائی وزیر شرجیل انعام میمن نے کہا ہے کہ سندھ حکومت وسائل کو عوام کے معیارِ زندگی کو بہتر بنانے، روزگار، تعلیم، صحت اور جدید شہری سہولیات کی فراہمی پر خرچ کر رہی ہے۔
شرجیل میمن کا کہنا تھا کہ کچھ عناصر سیاسی مقاصد کے لیے کراچی اور سندھ کا منفی تاثر پیش کرنے کی کوشش کرتے ہیں۔ عوام ترقیاتی منصوبوں، بہتر ٹرانسپورٹ، جاری تعمیراتی کاموں اور عوامی فلاح کے اقدامات کو اپنی آنکھوں سے دیکھ رہی ہے۔انہوں نے مزید کہا کہ عوام بخوبی جانتی ہے کہ سندھ حکومت مشکلات کے باوجود وسائل کو عوام کی فلاح پر خرچ کر رہی ہے۔ مالی سال 2026-27 کا بجٹ محض اعداد و شمار کا مجموعہ نہیں بلکہ روشن مستقبل، بہتر روزگار اور ایک خوشحال سندھ کی جانب عملی پیش رفت کا بجٹ ہے۔ روزگار کے نئے مواقع پیدا کرنا سندھ حکومت کی معاشی حکمتِ عملی کا اہم ستون ہے۔ بجٹ میں نوجوانوں کے روشن مستقبل کو خصوصی اہمیت دی گئی ہے۔انہوں نے کہا کہ صنعتی زونز، ترقیاتی منصوبوں، ٹرانسپورٹ اسکیموں اور بڑے انفراسٹرکچر منصوبوں کے ذریعے ہزاروں نوجوانوں کے لیے روزگار کے نئے دروازے کھلیں گے۔ پاکستان پیپلز پارٹی کی سیاست کا مرکز ہمیشہ عام آدمی، محنت کش، مزدور، کسان، نوجوان اور متوسط طبقہ رہا ہے۔کراچی کے عوام کے مسائل حل کرنا ہماری ذمہ داری اور عزم ہے۔ کراچی کے عوام کی سب سے بڑی ضرورت جدید، محفوظ اور باوقار سفری سہولیات ہیں، حکومت کو اس کا ادراک ہے۔انہوں نے کہا کہ سندھ حکومت عوام کی سفری ضروریات کو پورا کرنے کے لیے تاریخی اقدامات کر رہی ہے۔ 500 جدید الیکٹرک بسیں اور ڈبل ڈیکر بسیں جلد کراچی کی سڑکوں پر چلتی نظر آئیں گی۔