بلوچستان کے ضلع مستونگ میں لکپاس کے قریب واقع کسٹم کے گودام میں لگنے والی خوفناک آگ پر 22 گھنٹے گزرنے کے باوجود قابو نہیں پایا جا سکا، جبکہ امدادی کارروائیاں تاحال جاری ہیں۔
ڈپٹی کمشنر مستونگ کے مطابق آگ گزشتہ روز صبح تقریباً 10 بجے بھڑکی تھی، جس کے بعد سے فائر بریگیڈ اور ریسکیو ٹیمیں مسلسل آگ بجھانے میں مصروف ہیں۔ حکام کا کہنا ہے کہ 10 سے زائد فائر بریگیڈ گاڑیاں آگ پر قابو پانے کے لیے کارروائیوں میں حصہ لے رہی ہیں۔انتظامیہ کے مطابق گودام میں ایل پی جی سلینڈرز، ایندھن، کیمیکل، خشک میوہ جات، کپڑے اور ٹائرز بڑی مقدار میں موجود تھے، جس کے باعث آگ نے شدت اختیار کر لی۔ آگ لگنے کے بعد ایل پی جی باؤزرز اور گیس سلینڈرز میں متعدد دھماکے بھی ہوئے، جن سے علاقے میں خوف و ہراس پھیل گیا۔
ڈی سی مستونگ نے بتایا کہ آتشزدگی کے نتیجے میں جھلس کر 35 افراد زخمی ہوئے، جنہیں فوری طور پر اسپتال منتقل کر کے طبی امداد فراہم کی جا رہی ہے۔حکام کے مطابق آگ کے باعث 100 سے زائد گاڑیاں بھی جل کر تباہ ہو گئیں۔ تاہم رات گئے آگ کی شدت میں کمی آنے کے بعد کوئٹہ کراچی شاہراہ پر ٹریفک بحال کر دی گئی۔ضلعی انتظامیہ کا کہنا ہے کہ آگ پر مکمل قابو پانے تک امدادی سرگرمیاں جاری رہیں گی جبکہ واقعے کی وجوہات جاننے کے لیے تحقیقات بھی شروع کر دی گئی ہیں۔