پاکستان سے تیار کردہ نفرت انگیز اے آئی ویڈیوز برطانیہ میں پھیلاکر پیسہ کمائے جانیکا انکشاف

برطانیہ میں مصنوعی ذہانت (اے آئی) سے تیار کردہ نفرت انگیز ویڈیوز پھیلانے کے معاملے میں پاکستان کا نام بھی سامنے آگیا۔ دی بیورو آف انویسٹی گیٹو جرنلزم کی رپورٹ میں انکشاف کیا گیا ہے کہ سوشل میڈیا پلیٹ فارمز پر جعلی اور اشتعال انگیز ویڈیوز پھیلا کر میٹا کے اشتہاری ماڈل کے ذریعے مالی فائدہ اٹھایا گیا۔

رپورٹ کے مطابق ان ویڈیوز میں برطانوی وزیراعظم کیئر اسٹارمر اور لندن کے میئر صادقخان کو نشانہ بنایا گیا۔ ایک جعلی ویڈیو کو لاکھوں افراد نے دیکھا، جس کے بعد اس معاملے نے برطانیہ میں تشویش پیدا کر دی۔تحقیقات میں بتایا گیا کہ پاکستان میں موجود ایک شخص ان ویڈیوز کی پوسٹنگ میں ملوث پایا گیا۔ مذکورہ شخص نے اعتراف کیا کہ وہ سوشل میڈیا کے ذریعے ماہانہ آمدن حاصل کر رہا تھا۔ اس کا کہنا تھا کہ کمزور انگریزی کی وجہ سے وہ مواد کی نوعیت کو مکمل طور پر سمجھ نہیں سکا، تاہم بعد ازاں کچھ پوسٹس حذف کر دی گئیں۔رپورٹ میں کہا گیا ہے کہ نشاندہی کے بعد متعلقہ سوشل میڈیا اکاؤنٹس بھی بند کر دیے گئے۔ دوسری جانب لندن کے میئر کے ترجمان نے سوشل میڈیا کمپنیوں سے مطالبہ کیا ہے کہ نفرت انگیز، جعلی اور گمراہ کن مواد کے خلاف مزید مؤثر اقدامات کیے جائیں تاکہ آن لائن پلیٹ فارمز کو غلط معلومات کے پھیلاؤ کے لیے استعمال نہ کیا جا سکے۔