تہران: ایک تھائی پرچم بردار کارگو جہاز جو رواں ماہ کے آغاز میں آبنائے ہرمز میں نامعلوم حملے کا نشانہ بنا تھا، ایران کے جزیرے قشم جزیرہ کے قریب جا کر ریت میں پھنس گیا ہے۔ یہ خبر ایرانی خبر رساں ادارے تسنیم نیوز ایجنسی نے جاری کی۔
رپورٹس کے مطابق “میوری ناری” نامی اس جہاز کو 11 مارچ کو نشانہ بنایا گیا تھا جس کے بعد اس کے انجن روم میں زور دار دھماکہ ہوا، جس کے نتیجے میں آگ بھڑک اٹھی۔ دھماکے کے باعث جہاز کو شدید نقصان پہنچا اور عملے کو ہنگامی صورتحال کا سامنا کرنا پڑا۔تھائی حکام کا کہنا ہے کہ حملے کے فوری بعد عمانی بحریہ نے بروقت کارروائی کرتے ہوئے جہاز کے 20 افراد پر مشتمل عملے کو بحفاظت ریسکیو کر لیا، تاہم اب بھی تین افراد لاپتہ ہیں جن کی تلاش جاری ہے۔واقعے کے بعد جہاز کو قابو میں رکھنے کی کوشش کی گئی، لیکن شدید نقصان کے باعث یہ ایرانی ساحل کے قریب بہہ کر قشم جزیرے کے نزدیک ریت میں پھنس گیا۔ حکام کے مطابق واقعے کی نوعیت اور حملے میں استعمال ہونے والے ہتھیاروں کے بارے میں تاحال واضح معلومات سامنے نہیں آسکیں۔