کراچی میں ٹریفک حادثات کا سلسلہ تھم نہ سکا، شہر کے مختلف علاقوں میں پیش آنے والے دو افسوسناک واقعات میں خاتون سمیت دو افراد جان کی بازی ہار گئے جبکہ متعدد زخمی ہو گئے۔
پہلا حادثہ کورنگی کے علاقے بلال چورنگی میں پیش آیا جہاں ایک واٹر ٹینکر نے موٹرسائیکل سوار باپ اور بیٹی کو ٹکر مار دی۔ حادثے کے نتیجے میں بیٹی موقع پر ہی جاں بحق ہوگئی جبکہ باپ زخمی ہو گیا، جسے فوری طور پر اسپتال منتقل کر دیا گیا۔ واقعے کے بعد ٹینکر ڈرائیور گاڑی چھوڑ کر فرار ہونے میں کامیاب ہوگیا۔
دوسرا حادثہ بلدیہ ٹاؤن کے علاقے یوسف گوٹھ میں پیش آیا جہاں ٹریلر اور گاڑی کے درمیان تصادم ہوا۔ اس حادثے میں ایک شخص جاں بحق جبکہ 5 افراد زخمی ہو گئے، جن میں سے 3 کی حالت تشویشناک بتائی جا رہی ہے۔
شہر میں بڑھتے ہوئے ٹریفک حادثات نے شہریوں کو شدید تشویش میں مبتلا کر دیا ہے۔ عید الفطر کے تین دنوں کے دوران بھی مختلف حادثات میں 16 افراد جان سے ہاتھ دھو بیٹھے تھے، جبکہ رواں سال کے اعداد و شمار کے مطابق اب تک ہیوی ٹریفک کی زد میں آکر 83 افراد جاں بحق ہو چکے ہیں۔
اعداد و شمار کے مطابق سب سے زیادہ ہلاکتیں ٹرالرز کی ٹکر سے ہوئیں جبکہ واٹر ٹینکرز بھی شہریوں کے لیے بڑا خطرہ بن چکے ہیں۔ ماہرین کا کہنا ہے کہ ٹریفک قوانین پر سختی سے عملدرآمد اور ہیوی گاڑیوں کی نگرانی کے بغیر ایسے حادثات کو روکنا ممکن نہیں۔
کراچی میں ٹریفک حادثات، خاتون سمیت 2 افراد جاں بحق
