اقوام متحدہ کے سیکرٹری جنرل کے عہدے کیلئے امیدوار میکی سال (MACKY SALL)
نے وزیراعظم محمد شہباز شریف سے اسلام آباد میں ملاقات کی ۔انہوں نے اقوام متحدہ میں پاکستان کی دیرینہ اور گراں قدر خدمات کو سراہتے ہوئے عالمی امن کے فروغ کے لیے جاری کوششوں میں پاکستانی قیادت کے تعمیری کردار کوسراہا۔
وزیراعظم نے میکی سال کا خیرمقدم کرتے ہوئے کثیرالجہتی تعاون کے لیے پاکستان کے غیر متزلزل عزم کا اعادہ کیا ۔انہوں نے عالمی امور میں اقوام متحدہ کے مرکزی کردار کیلئےپاکستان کی مضبوط اور غیر متزلزل حمایت کا اظہار کیا۔محمدشہبازشریف نے امید ظاہر کی کہ اقوام متحدہ کی آئندہ قیادت عالمی ادارے کے عالمی امن و سلامتی، ترقی اور انسانی حقوق کے تین بنیادی ستونوں کو متوازن انداز میں آگے بڑھانے کے لیے مؤثر کردار ادا کرے گی۔
وزیراعظم نے اقوام متحدہ کے منشور کے مقاصد اور اصولوں کی پاسداری، سلامتی کونسل کی قراردادوں پر من و عن عملدرآمد اور عالمی امن، سلامتی اور خوشحالی کے لیے بین الاقوامی قانون اور معاہدوں کے احترام کیلئےپاکستان کے مستقل اور غیر متزلزل عزم کا اعادہ کیا۔