امریکی صدر ڈونلڈ ٹرمپ نے ایران کے ساتھ مذاکرات کے لیے ایک اعلیٰ سطحی وفد پاکستان بھیجنے کا اعلان کیا ہے، جس کی قیادت امریکی نائب صدر جے ڈی وینس کریں گے۔
وائٹ ہاؤس کی ترجمان کیرولین لیویٹ کے مطابق یہ مذاکراتی وفد اس ہفتے کے آخر میں اسلام آباد پہنچے گا، جہاں ایران کے نمائندوں کے ساتھ اہم بات چیت کی جائے گی۔ وفد میں خصوصی نمائندہ اسٹیو وٹکوف اور صدر ٹرمپ کے داماد جیرڈ کشنر بھی شامل ہوں گے۔
ترجمان کے مطابق مذاکرات کا پہلا دور ہفتہ کی صبح مقامی وقت کے مطابق شروع ہوگا۔ انہوں نے کہا کہ جے ڈی وینس اس عمل میں شروع سے ہی اہم کردار ادا کرتے آ رہے ہیں اور صدر ٹرمپ کے قریبی ساتھی ہونے کے باعث مذاکرات میں مرکزی حیثیت رکھتے ہیں۔
کیرولین لیویٹ نے اس بات کا بھی ذکر کیا کہ چین نے جنگ بندی کے حوالے سے اہم کردار ادا کیا اور دونوں ممالک کے درمیان اعلیٰ سطح پر رابطے ہوئے، جس کے نتیجے میں کشیدگی میں کمی ممکن ہوئی۔
سیکیورٹی خدشات سے متعلق سوال پر وائٹ ہاؤس ترجمان نے کہا کہ امریکی سیکرٹ سروس مکمل طور پر مستعد ہے اور نائب صدر سمیت پوری ٹیم کی حفاظت کو یقینی بنایا جائے گا۔
ماہرین کے مطابق پاکستان میں ان مذاکرات کا انعقاد خطے میں امن کے قیام کے لیے ایک اہم قدم ثابت ہو سکتا ہے اور اس سے عالمی سطح پر پاکستان کے سفارتی کردار کو مزید تقویت ملے گی۔
امریکی نائب صدر وینس ایران مذاکرات کیلئے کل پاکستان پہنچیں گے
