یمن کے معروف مہم جو اور سوشل میڈیا شخصیت الققع بن عنتر ایک المناک حادثے میں جان کی بازی ہار گئے۔ 30 سالہ الققع بن عنتر، جو اپنے خطرناک کارناموں اور بلند پہاڑوں پر بغیر حفاظتی سامان کے چڑھائی کی وجہ سے "یمن کے اسپائیڈر مین” کے نام سے مشہور تھے، ایک آتش فشاں کے گہرے گڑھے میں گرنے کے باعث زندگی کی بازی ہار گئے۔
مقامی حکام کے مطابق حادثہ یمن کے صوبہ الضالع میں واقع حرضۃ دمت آتش فشاں کے مقام پر پیش آیا۔ الققع بن عنتر تقریباً 120 میٹر گہرے آتش فشانی گڑھے کے کنارے مہم جوئی کر رہے تھے کہ اچانک توازن کھو بیٹھے اور گہرائی میں جا گرے۔
الققع بن عنتر سوشل میڈیا پر اپنی جرات مندانہ ویڈیوز کے باعث بے حد مقبول تھے۔ وہ اکثر بلند و بالا چٹانوں، دشوار گزار پہاڑوں اور خطرناک مقامات پر چڑھائی کرتے ہوئے اپنی ویڈیوز شیئر کرتے تھے۔ ان کے لاکھوں مداح ان کی مہم جوئی اور بے خوف انداز کو سراہتے تھے، جس کی وجہ سے انہیں "یمن کا اسپائیڈر مین” کہا جاتا تھا۔
حادثے کی اطلاع ملتے ہی سول ڈیفنس اور ریسکیو ٹیموں نے امدادی کارروائی شروع کر دی، تاہم آتش فشاں کے دشوار گزار مقام، محدود رسائی اور گڑھے کے اندر خطرناک حالات نے آپریشن کو انتہائی پیچیدہ بنا دیا۔ ریسکیو اہلکاروں کو شدید مشکلات کا سامنا کرنا پڑا اور کئی گھنٹوں تک کوششیں جاری رہیں۔
مقامی میڈیا کے مطابق امدادی کارروائی تقریباً 24 گھنٹے تک جاری رہی۔ ریسکیو ٹیموں نے خصوصی آلات، طاقتور روشنیوں اور پانی سے نکالنے والے جدید سازوسامان کی مدد سے گڑھے تک رسائی حاصل کی۔ طویل جدوجہد کے بعد الققع بن عنتر کی لاش نکال لی گئی۔
ان کی وفات کی خبر سامنے آنے کے بعد سوشل میڈیا پر مداحوں اور ساتھی مہم جوؤں نے گہرے دکھ اور افسوس کا اظہار کیا۔ متعدد صارفین نے انہیں ایک نڈر، باصلاحیت اور حوصلہ مند شخصیت قرار دیتے ہوئے خراج عقیدت پیش کیا۔
یمن کا ’اسپائیڈر مین‘ آتش فشاں گڑھے میں گر کر جاں بحق
