کراچی کے مختلف علاقوں میں جمعہ کی شام زلزلے کے ہلکے جھٹکے محسوس کیے گئے، جس کے باعث شہریوں میں کچھ دیر کے لیے خوف و ہراس پھیل گیا اور متعدد افراد احتیاطاً گھروں اور دفاتر سے باہر نکل آئے۔
محکمہ موسمیات کے مطابق زلزلے کی شدت 2.9 ریکارڈ کی گئی، جبکہ اس کا مرکز شہر کراچی تھا۔ زلزلے کی گہرائی 10 کلومیٹر ریکارڈ کی گئی، جس کے باعث شہر کے مختلف علاقوں میں ہلکے جھٹکے محسوس کیے گئے۔
محکمہ موسمیات نے بتایا کہ زلزلہ شام 6 بج کر 1 منٹ پر آیا۔ اگرچہ شدت کم تھی، تاہم شہریوں نے جھٹکوں کو واضح طور پر محسوس کیا۔
ابتدائی اطلاعات کے مطابق زلزلے کے باعث کسی جانی یا مالی نقصان کی کوئی اطلاع موصول نہیں ہوئی، جبکہ متعلقہ ادارے صورتحال پر نظر رکھے ہوئے ہیں۔
ماہرین کے مطابق کم شدت کے زلزلے عموماً بڑے پیمانے پر نقصان کا باعث نہیں بنتے، تاہم شہریوں کو چاہیے کہ زلزلے کی صورت میں احتیاطی تدابیر اختیار کریں، غیر ضروری طور پر لفٹ کا استعمال نہ کریں اور محفوظ مقامات پر منتقل ہو جائیں۔
کراچی میں زلزلے کے جھٹکے، شہریوں میں خوف و ہراس
