کراچی میں افسوسناک واقعہ پیش آیا ہے جہاں گٹر کی صفائی کے دوران 3 مزدور دم گھٹنے سے جاں بحق ہوگئے۔
یہ حادثہ شہر کے علاقے لیاری سیکٹر 36 میں پیش آیا، جہاں مزدور سیوریج لائن کی صفائی میں مصروف تھے۔اطلاعات کے مطابق مزدور گٹر میں اتر کر صفائی کا کام کر رہے تھے کہ اچانک زہریلی گیس بھرنے کے باعث ان کی حالت غیر ہوگئی۔ امدادی ٹیموں نے موقع پر پہنچ کر لاشوں کو باہر نکالا اور ضروری کارروائی کے لیے اسپتال منتقل کیا۔واقعے پر وزیراعلیٰ سندھ سید مراد علی شاہ نے گہرے دکھ اور افسوس کا اظہار کیا ہے۔ انہوں نے متعلقہ حکام سے فوری رپورٹ طلب کرتے ہوئے واقعے کی مکمل تحقیقات کا حکم دیا ہے تاکہ ذمہ داروں کا تعین کیا جا سکے۔وزیراعلیٰ سندھ کا کہنا تھا کہ انسانی جانوں کا ضیاع انتہائی افسوسناک ہے اور ایسے واقعات کی روک تھام کے لیے مؤثر اقدامات ناگزیر ہیں۔
واضح رہے کہ کراچی میں اس سے قبل بھی متعدد مزدور گٹروں اور سیوریج لائنوں کی صفائی کے دوران زہریلی گیس کے باعث جان کی بازی ہار چکے ہیں، جس پر حفاظتی اقدامات اور جدید مشینری کے استعمال کی ضرورت بارہا سامنے آچکی ہے۔