کراچی کے ڈی آئی جی ٹریفک پیر محمد شاہ نے شہر میں ٹریفک کی صورتحال پر تشویش کا اظہار کرتے ہوئے انکشاف کیا ہے کہ اس وقت کراچی میں تقریباً 46 لاکھ موٹر سائیکلیں موجود ہیں، جن میں سے 60 فیصد پر جعلی نمبر پلیٹس لگی ہوئی ہیں۔ ان کے مطابق یہ صورتحال نہ صرف ٹریفک نظم و ضبط بلکہ سکیورٹی کے حوالے سے بھی ایک بڑا چیلنج بن چکی ہے۔
ڈی آئی جی ٹریفک نے بتایا کہ ماضی میں کراچی میں تقریباً 20 لاکھ موٹر سائیکلیں رجسٹرڈ تھیں، تاہم وقت کے ساتھ ان کی تعداد بڑھ کر 46 لاکھ تک پہنچ گئی ہے۔ انہوں نے کہا کہ اتنی بڑی تعداد میں موٹر سائیکلوں کی موجودگی شہر کے ٹریفک نظام پر اضافی دباؤ ڈال رہی ہے، جبکہ جعلی نمبر پلیٹس قانون نافذ کرنے والے اداروں کے لیے بھی مشکلات پیدا کر رہی ہیں۔
انہوں نے مزید بتایا کہ ایک وقت تھا جب کراچی کی سڑکوں پر 9 ہزار بسیں عوام کو سفری سہولت فراہم کرتی تھیں، لیکن اب ان کی تعداد کم ہو کر صرف 2 ہزار رہ گئی ہے۔ دوسری جانب شہر میں 3 لاکھ رکشے چل رہے ہیں، جس سے ٹریفک کا دباؤ مزید بڑھ گیا ہے۔
پیر محمد شاہ نے کہا کہ ٹریفک کی روانی بہتر بنانے کے لیے لین ڈسپلن پر سختی سے عمل درآمد کرایا جا رہا ہے۔ انہوں نے موٹر سائیکل سواروں پر زور دیا کہ وہ اپنی حفاظت کے لیے ہیلمٹ کا لازمی استعمال کریں اور تمام ٹریفک قوانین کی پابندی کریں۔
ای چالان کے نظام کے بارے میں گفتگو کرتے ہوئے انہوں نے کہا کہ اس میں ابھی کچھ تکنیکی مسائل موجود ہیں اور نظام کو مزید مؤثر بنانے پر کام جاری ہے۔ ان کے بقول، کراچی کا ٹریفک نظام کئی دہائیوں سے مختلف مسائل کا شکار رہا ہے، اس لیے مکمل بہتری ایک مرحلہ وار عمل ہے اور اس کے مثبت نتائج سامنے آنے میں وقت لگے گا۔
ڈی آئی جی ٹریفک نے شہریوں سے اپیل کی کہ وہ اپنی گاڑیوں اور موٹر سائیکلوں پر صرف اصل نمبر پلیٹس استعمال کریں، ٹریفک قوانین کی پابندی کریں اور ہیلمٹ پہننے کو اپنی عادت بنائیں۔ انہوں نے کہا کہ عوام کے تعاون کے بغیر کراچی میں ٹریفک کے مسائل پر قابو پانا ممکن نہیں۔
کراچی میں 60 فیصد موٹر سائیکلوں پر جعلی نمبر پلیٹس، ڈی آئی جی ٹریفک کا انکشاف
