انٹرنیشنل کرکٹ کونسل کے ضابطہ اخلاق کی خلاف ورزی پر پاکستانی فاسٹ بولر نسیم شاہ پر جرمانہ عائد کر دیا گیا ہے۔ یہ کارروائی انٹرنیشنل لیگ ٹی ٹوئنٹی میں لیول ون خلاف ورزی پر کی گئی۔
ڈیزرٹ وائپرز کی نمائندگی کرنے والے 22 سالہ نسیم شاہ کو دبئی انٹرنیشنل کرکٹ اسٹیڈیم میں کھیلے گئے سیزن فور کے فائنل کے دوران ایم آئی ایمریٹس کے خلاف میچ میں آئی سی سی کوڈ آف کنڈکٹ کے آرٹیکل 2.5 کی خلاف ورزی کا مرتکب پایا گیا۔ اس خلاف ورزی پر ان کی میچ فیس کا 10 فیصد جرمانہ عائد کیا گیا۔
آرٹیکل 2.5 آؤٹ ہونے کے بعد بیٹر کو اشتعال دلانے، یا توہین آمیز رویے، زبان یا اشاروں سے متعلق ہے۔ واقعہ فائنل کے 11ویں اوور میں پیش آیا، جب ایم آئی ایمریٹس کے کپتان کیرون پولارڈ نے نسیم شاہ کی گیند کھیلی اور گیند واپس بولر کی جانب آئی۔
نسیم شاہ نے گیند اٹھا کر مسکراتے ہوئے پولارڈ کی طرف دیکھا، جس پر پولارڈ نے سخت ردِعمل دیا اور دونوں کے درمیان تلخ کلامی شروع ہو گئی۔ بات بڑھنے پر دونوں کھلاڑی ایک دوسرے کے قریب آ گئے اور صورتحال کشیدہ ہو گئی۔
امپائرز اور ڈیزرٹ وائپرز کے دیگر کھلاڑیوں نے مداخلت کر کے معاملہ قابو میں کیا، تاہم دونوں کھلاڑی واضح طور پر ناخوش دکھائی دیے۔
بعد ازاں نسیم شاہ نے 16ویں اوور کی پہلی گیند پر کیرون پولارڈ کو آؤٹ کر کے اپنی کارکردگی سے جواب دیا۔
واضح رہے کہ ڈیزرٹ وائپرز نے فائنل میں ایم آئی ایمریٹس کو 46 رنز سے شکست دے کر پہلی بار انٹرنیشنل لیگ ٹی ٹوئنٹی کا ٹائٹل اپنے نام کیا۔
آئی سی سی ضابطہ اخلاق کی خلاف ورزی، نسیم شاہ پر میچ فیس کا 10 فیصد جرمانہ
