آئی ایس پی آر کے مطابق عراقی فضائیہ کے سربراہ نے پاکستان فضائیہ کی پیشہ ورانہ مہارت، جدید ٹیکنالوجی اور عالمی معیار کی تربیت کو سراہتے ہوئے اس سے استفادہ کرنے میں گہری دلچسپی کا اظہار کیا ہے۔
پاک فوج کے شعبہ تعلقات عامہ کی جانب سے ہفتے کو جاری بیان میں بتایا گیا کہ پاک فضائیہ کے سربراہ ایئر چیف مارشل ظہیر احمد بابر سدھو نے سرکاری دورۂ عراق کے دوران عراقی فضائیہ کے کمانڈر لیفٹیننٹ جنرل اسٹاف پائلٹ محند غالب محمد راضی الاسدی سے ملاقات کی۔بیان کے مطابق ملاقات میں دوطرفہ عسکری تعاون کو فروغ دینے پر تفصیلی تبادلہ خیال کیا گیا، جس میں مشترکہ تربیت، صلاحیت سازی اور عملی تعاون کو مزید مضبوط بنانے پر خصوصی توجہ دی گئی۔آئی ایس پی آر نے بتایا کہ عراقی فضائیہ کے سربراہ نے پاک فضائیہ کی پیشہ ورانہ صلاحیتوں اور جدید نظام کی تعریف کی، عالمی معیار کی تربیت سے فائدہ اٹھانے کی خواہش ظاہر کی اور جے ایف 17 تھنڈر لڑاکا طیاروں کے ساتھ ساتھ سپر مشاق تربیتی طیاروں میں گہری دلچسپی ظاہر کی۔
بیان میں مزید کہا گیا کہ عراقی فضائیہ کے سربراہ نے خطے میں امن اور استحکام کے لیے پاکستان کے کردار کو بھی قابلِ تحسین قرار دیا۔