اینکر پرسن اقرارالحسن نے آج لاہور میں “عوام راج” کے نام سے ایک نئی تحریک کے آغاز کا اعلان کیا جو ملک میں ایک جمہوری سیاسی جماعت کے قیام کے لیے فکری، شعوری اور نظریاتی جدوجہد کرے گی۔ اُن کا کہنا تھا کہ ہم نے آج تک شخصیات اور خاندانوں کو سیاسی جماعتیں سمجھا ہے، لیکن سیاسی جماعت کسی ایک فرد یا فیملی کی ذاتی دکان نہیں بلکہ ایک جمہوری ادارہ ہوتی ہے جو عوام اور لوگوں کی ملکیت ہوتی ہے۔ انہوں نے کہا کہ جب تک سیاسی جماعتوں میں جمہوریت نئیں آئے گی، یہ سیاسی جماعتیں ملک میں کبھی جمہوریت نہیں لا سکتیں۔ ملک میں ایک عام آدمی اور مڈل کلاس نوجوان کے آگے آنے کا بھی واحد راستہ یہی ہے کہ ایک ایسی سیاسی جماعت کا قیام عمل میں لایا جائے جس میں انٹرنل الیکشن اور میرٹ پر مبنی نظام کے تحت لوگ مخصوص مدت کے لیے عہدیدارن منتخب ہوں۔ صرف اسی طریقے سے ایک عام آدمی اور مڈل کلاس نوجوان پارٹی چیئرمین اور ملک کا وزیراعظم بن سکتا ہے ورنہ صرف دولت مند اور اُن کے چاپلوس اور وفادار لوگ آگے آتے رہیں گے۔
اقرارالحسن کا کہنا تھا کہ ملک میں اسٹیبلشمنٹ کی غیر آئینی مداخلت کا حل بھی یہی ہے کہ ہم فوجی آمروں کے سامنے سیاسی آمروں کو لانے کی بجائے ادارے کے مقابلے میں ایک سیایس جمہوری ادارہ قائم کریں۔ انہوں نے مزید کہا کہ بلوچستان، طالبان، دہشت گردی، مہنگائی، غربت، بے روزگاری، لوڈشیڈنگ، ناانصافی اور صحت اور تعلیم سمیت پاکستان کے ہر مسئلے کا حل یہ ہے کہ نظام ٹھیک سے کام کرنے لگے اور نظام تب ٹھیک سے کام کرے گا جب اسے چلانے والے ٹھیک لوگ آگے آئیں گے۔ اور ٹھیک لوگ تب آگے آئیں گے جب سیاسی جماعتوں میں لوگوں کو آگے لانے کا نظام شفافیت، جمہوریت اور میرٹ پر مبنی ہو گا۔
انہوں نے یہ بھی کہا کہ سیاسی جماعتوں میں جمہوریت، طلباء تنظیموں کی بحالی اور بلدیاتی نظام کو مضبوط اور فعال کیے بغیر پاکستان میں جمہوریت کا خواب کبھی شرمندۂ تعبیر نہیں ہو سکتا۔