سینئر صحافی اور تجزیہ نگار مبشر لقمان نے کہا ہے کہ لاہور پریس کلب کے انتخابات سے چند روز قبل صحافیوں کو کالونیاں اور پلاٹس دینے کا اعلان دراصل ایک مخصوص گروپ کی حمایت اور اسے فائدہ پہنچانے کی کوشش ہے۔
ان کا کہنا تھا کہ صوبائی وزیر اطلاعات عظمیٰ بخاری اس اقدام کے ذریعے انتخابی عمل پر اثرانداز ہو رہی ہیں، جو صحافتی برادری کی آزادی اور انتخابی شفافیت کے لیے سوالیہ نشان ہے۔
مبشر لقمان کے مطابق صحافیوں کو مراعات دینا ایک پالیسی فیصلہ ہو سکتا ہے، لیکن اسے انتخابات سے عین پہلے متعارف کرانا اس تاثر کو مضبوط کرتا ہے کہ یہ اقدام رائے عامہ کو متاثر کرنے اور نتائج کو مخصوص سمت میں موڑنے کی کوشش ہے۔
انہوں نے زور دیا کہ پریس کلب کے انتخابات کو آزاد، غیر جانبدار اور حکومتی مداخلت سے پاک رہنا چاہیے تاکہ صحافتی برادری کا وقار اور اعتماد برقرار رہ سکے۔
لاہور پریس کلب کے صدر کے امیدوار اور سینئر صحافی اعظم چوہدری نے صوبائی وزیر اطلاعات پنجاب عظمیٰ بخاری کے بیان پر سخت ردعمل دیا ہے۔ ان کا کہنا ہے کہ صحافیوں کو ’’کالی بھیڑیں‘‘ اور ’’شرپسند‘‘ کہنا ناقابل قبول ہے اور پریس کلب کے انتخابات میں حکومتی مداخلت برداشت نہیں کی جائے گی۔
اعظم چوہدری نے کہا کہ انتخابات دسمبر سے جنوری منتقل کرنے کا فیصلہ صحافیوں کا اندرونی معاملہ ہے، کسی وزیر کو اس میں مداخلت کا حق نہیں۔ ان کے مطابق صحافی کمیونٹی کے مسائل، روزگار کے تحفظ اور فلاحی ایجنڈے پر الیکشن لڑتی ہے، مگر حکومتی بیانات نے نیا تنازع کھڑا کر دیا ہے۔
انہوں نے واضح کیا کہ جب تک وزیر اطلاعات اور متعلقہ حکام صحافیوں سے معافی نہیں مانگتے، لاہور پریس کلب کے انتخابات ہونے نہیں دیے جائیں گے۔