میرپورماتھیلو (باغی ٹی وی/نامہ نگار مشتاق علی لغاری)جماعت اسلامی ضلع گھوٹکی کی جانب سے بروز منگل 4 فروری 2026 کو ڈہرکی شہر میں مظلوم کشمیری عوام سے اظہارِ یکجہتی کے لیے ایک پُرامن ریلی نکالی گئی۔ ریلی کے شرکاء نے کشمیر بنے گا پاکستان اور کشمیری عوام کے حق میں بھرپور نعرے لگائے، جس سے شہر کی فضا گونج اٹھی۔
ریلی کا آغاز ڈہرکی شہر کے مین روڈ پر واقع الخدمت کلینک کے سامنے سے ہوا، جس میں جماعت اسلامی، اسلامی جمعیت طلبہ کے کارکنان اور شہریوں کی بڑی تعداد نے شرکت کی۔ شرکاء نے ہاتھوں میں بینرز اور پلے کارڈز اٹھا رکھے تھے جن پر کشمیری عوام سے یکجہتی اور بھارتی مظالم کے خلاف نعرے درج تھے۔
ریلی کی صدارت ناظم اسلامی جمعیت طلبہ ڈہرکی مدثر حسین ابڑو نے کی، جبکہ اس موقع پر معتمد اسلامی جمعیت طلبہ ڈہرکی برادر اسد علی آرائیں بھی موجود تھے۔ مقررین نے اپنے خطاب میں کہا کہ کشمیر پاکستان کی شہ رگ ہے اور کشمیری عوام کی جدوجہدِ آزادی کو کسی صورت تنہا نہیں چھوڑا جائے گا۔
مقررین نے عالمی برادری سے مطالبہ کیا کہ وہ مقبوضہ کشمیر میں جاری بھارتی مظالم کا نوٹس لے اور کشمیری عوام کو اقوامِ متحدہ کی قراردادوں کے مطابق حقِ خود ارادیت دلانے کے لیے عملی کردار ادا کرے۔ ریلی پُرامن طور پر اختتام پذیر ہوئی۔