خیبرپختونخوا میں گزشتہ 3 ماہ کے دوران دہشت گردوں نے 66 حملے کئے جن میں پولیس تھانوں اور دیگر مقامات کو نشانہ بنایا گیا۔ دوسری جانب صوبے کی حکومت نے ان حملوں سے نمٹنے کیلئے پولیس کو مزید وسائل دینے کا اعلان کردیا۔
وزیراعلی خیبرپختونخوا سہیل آفریدی کی زیرصدارت اعلیٰ سطح کا اجلاس ہوا، جس میں چیف سیکریٹری اور آئی جی خیبرپختونخوا سمیت دیگر حکام کی شرکت کی۔حکام نے بریفنگ میں بتایا کہ گزشتہ تین ماہ میں دہشت گردوں نے 66 حملے کئے، ان حملوں میں سرکاری فورسز کو نشانہ بنایا گیا، تھانوں پر ڈرون گرائے گئے، دہشت گردوں نے جانی نقصان سے بچنے کیلئے ڈرون کی ٹیکنالوجی اختیار کی، ڈرون کے علاوہ آئی ای ڈی لگانے کا ٹرینڈ بھی نقصان کا باعث بنا۔
وزیراعلیٰ کے پی نے کہا کہ دہشت گردوں کے مقابلے کیلئے پولیس کو وسائل دے رہے ہیں، مشکل علاقوں میں پولیس کو بکتربند گاڑیاں اور اسلحہ دے دیا گیا ہے۔ان کا کہنا ہے کہ پولیس بتائے جو بھی درکار ہوگا اگلے کابینہ اجلاس میں مزید ضروریات بھی منظور کرلیں گے، دہشت گردوں کے ساتھ جرائم پیشہ عناصر بھی پولیس اور دیگر فورسز کو انگیج کررہے ہیں، عید الفطر کے بعد صوبے میں قبضہ مافیا کیخلاف ایک بڑی مہم شروع کرنے جارہے ہیں۔